O‘zbekistonda Tashabbusli byudjetning 2026 yil birinchi mavsumi doirasida o‘tkazilgan ovoz berish yakunlandi.
Qayd etilishicha, loyihalar uchun jami 10 million 284 mingdan ortiq ovoz berilgan. Jarayon davomida fuqarolardan 21 049 ta tashabbus kelib tushgan bo‘lib, shundan 17 424 tasi saralash bosqichidan o‘tgan.
Ovoz berish natijalariga ko‘ra, 1996 ta loyiha g‘olib deb topildi. Ularni amalga oshirish uchun 3 trillion 5 milliard 827 million so‘mdan ortiq mablag‘ ajratilishi rejalashtirilgan.
G‘olib loyihalar orasida eng katta ulush ichki yo‘llarni ta’mirlashga to‘g‘ri keladi — 868 ta loyiha. Shuningdek, maktablarni ta’mirlash va ularning moddiy-texnik bazasini rivojlantirish bo‘yicha 566 ta, sog‘liqni saqlash muassasalarini ta’mirlash hamda jihozlashga doir 163 ta loyiha g‘olib bo‘lgan.
Eng ko‘p ovoz to‘plagan ayrim hududlarda aholi g‘alabani bayramona ruhda nishonlagani, musiqа, raqs va kontsert dasturlari tashkil etilgani qayd etildi.
Ma’lumot uchun, ovoz berish jarayoni 11 martdan 20 martgacha davom etdi. Mazkur loyiha doirasida fuqarolar mahalliy byudjet mablag‘larining bir qismini taqsimlashda bevosita ishtirok etish imkoniyatiga ega.
