U mamlakkatga tashrifi davomida kongoliklarga murojaat qilib, kasallikka qarshi kurashda xalqaro hamjamiyat yordam berishini ta’kidlagan.
“Bu kasallikni to‘xtatish mumkin. Birgalikda biz bu avj olgan epidemiyani yengib o‘tamiz”, degan JSST rahbari.
Tashkilot ma’lumotlariga ko‘ra, 15 may kuni e’lon qilingan yangi epidemiya boshlanganidan buyon Kongo Demokratik Respublikasida 10 ta tasdiqlangan va 223 ta gumon qilingan o‘lim holati qayd etilgan. Virusni yuqtirganlar soni esa ming nafardan oshgan.
JSST haqiqiy ko‘rsatkichlar bundan ham yuqori bo‘lishi mumkinligini bildirmoqda. Chunki virus ma’lum vaqt aniqlanmasdan tarqalgan bo‘lishi ehtimoli bor.
Ma’lumot uchun, bu Kongo tarixidagi 17-Ebola epidemiyasi hisoblanadi. Mamlakatda ushbu virus ilk bor 1976 yilda aniqlangan.
Hozirgi epidemiyada o‘lim darajasi 24,6 foizni tashkil etmoqda. Bu Ebola virusi bo‘yicha o‘rtacha global ko‘rsatkich — 50 foizdan past.
Mutaxassislar hozircha Bundibugyo shtammi uchun tasdiqlangan davo mavjud emasligini aytmoqda. Shu bilan birga, JSST vaktsina va davolash usullari bo‘yicha klinik sinovlarni boshlashni tavsiya qilgan.
Qo‘shni Uganda esa Ebola bilan bog‘liq holatlar aniqlanganidan keyin Kongo bilan chegarasini yopishini ma’lum qildi. JSST esa bunday choralar noqonuniy o‘tishlarni ko‘paytirib, kasallikni nazorat qilishni qiyinlashtirishi mumkinligidan ogohlantirgan.
