У мамлакатга ташрифи давомида конголикларга мурожаат қилиб, касалликка қарши курашда халқаро ҳамжамият ёрдам беришини таъкидлаган.
“Бу касалликни тўхтатиш мумкин. Биргаликда биз бу авж олган эпидемияни енгиб ўтамиз”, деган ЖССТ раҳбари.
Ташкилот маълумотларига кўра, 15 май куни эълон қилинган янги эпидемия бошланганидан буён Конго Демократик Республикасида 10 та тасдиқланган ва 223 та гумон қилинган ўлим ҳолати қайд этилган. Вирусни юқтирганлар сони эса минг нафардан ошган.
ЖССТ ҳақиқий кўрсаткичлар бундан ҳам юқори бўлиши мумкинлигини билдирмоқда. Чунки вирус маълум вақт аниқланмасдан тарқалган бўлиши эҳтимоли бор.
Маълумот учун, бу Конго тарихидаги 17-Эбола эпидемияси ҳисобланади. Мамлакатда ушбу вирус илк бор 1976 йилда аниқланган.
Ҳозирги эпидемияда ўлим даражаси 24,6 фоизни ташкил этмоқда. Бу Эбола вируси бўйича ўртача глобал кўрсаткич — 50 фоиздан паст.
Мутахассислар ҳозирча Bundibugyo штамми учун тасдиқланган даво мавжуд эмаслигини айтмоқда. Шу билан бирга, ЖССТ вакцина ва даволаш усуллари бўйича клиник синовларни бошлашни тавсия қилган.
Қўшни Уганда эса Эбола билан боғлиқ ҳолатлар аниқланганидан кейин Конго билан чегарасини ёпишини маълум қилди. ЖССТ эса бундай чоралар ноқонуний ўтишларни кўпайтириб, касалликни назорат қилишни қийинлаштириши мумкинлигидан огоҳлантирган.
