Nyu-Dehli markazida shanba kuni “Tarakanlar partiyasi” tarafdorlari ishtirokida yirik namoyish bo‘lib o‘tdi. Bu haqda Associated Press xabar berdi.
Ma’lum qilinishicha, bir necha hafta oldin internetda hazil sifatida paydo bo‘lgan harakat qisqa vaqt ichida Hindiston yoshlari noroziligining ramziga aylangan.
Namoyish Jantar-Mantar maydonida o‘tkazilib, harakatning ijtimoiy tarmoqlardan real maydonga chiqishdagi ilk katta sinovi bo‘ldi. Tashkilotchilar onlayn qo‘llab-quvvatlov haqiqiy siyosiy ta’sirga aylana oladimi-yo‘qmi, shuni aniqlashga harakat qildi.
Yig‘inga asosan yoshlar tashrif buyurib, tarakan niqoblari va plakatlar bilan chiqishdi. Ayrim ishtirokchilar esa ta’lim va teng imkoniyatlar ramzi sifatida milliy bayroq va kitoblar olib kelishdi.
Harakat paydo bo‘lishiga Hindiston Oliy sudi raisi Surya Kantning tanqidchilar va ishsiz yoshlarni tarakanlarga qiyoslagan bayonoti sabab bo‘lgan. Bu so‘zlar jamoatchilikda keng norozilikka sabab bo‘lgan.
Shundan so‘ng Boston universiteti talabasi Abhijit Dipke ushbu ifodani satirik siyosiy harakatga aylantirgan.
“Tarakanlar partiyasi” tez orada internetda ommalashib, millionlab obunachilarni to‘pladi. Harakat tarafdorlari ishsizlik, korrupsiya va ta’lim tizimidagi muammolarga e’tibor qaratishni talab qilib kelmoqda.
Shanba kungi namoyishda asosiy talab sifatida ta’lim vaziri Dharmendra Pradhanning iste’fosi ilgari surildi. Biroq aksiya tez orada kengayib, yoshlarning iqtisodiy qiyinchiliklari va kelajak imkoniyatlari cheklanganiga qarshi umumiy norozilikka aylandi.
Ishtirokchilar “Tarakanlar kelyapti — Dharmendra Pradhan ketyapti!” degan shiorlar bilan chiqish qilib, hukumatni yoshlar muammolariga e’tibor qaratishga chaqirishdi.
