Нью-Деҳли марказида шанба куни “Тараканлар партияси” тарафдорлари иштирокида йирик намойиш бўлиб ўтди. Бу ҳақда Associated Press хабар берди.
Маълум қилинишича, бир неча ҳафта олдин интернетда ҳазил сифатида пайдо бўлган ҳаракат қисқа вақт ичида Ҳиндистон ёшлари норозилигининг рамзига айланган.
Намойиш Жантар-Мантар майдонида ўтказилиб, ҳаракатнинг ижтимоий тармоқлардан реал майдонга чиқишдаги илк катта синови бўлди. Ташкилотчилар онлайн қўллаб-қувватлов ҳақиқий сиёсий таъсирга айлана оладими-йўқми, шуни аниқлашга ҳаракат қилди.
Йиғинга асосан ёшлар ташриф буюриб, таракан ниқоблари ва плакатлар билан чиқишди. Айрим иштирокчилар эса таълим ва тенг имкониятлар рамзи сифатида миллий байроқ ва китоблар олиб келишди.
Ҳаракат пайдо бўлишига Ҳиндистон Олий суди раиси Сурья Кантнинг танқидчилар ва ишсиз ёшларни тараканларга қиёслаган баёноти сабаб бўлган. Бу сўзлар жамоатчиликда кенг норозиликка сабаб бўлган.
Шундан сўнг Бостон университети талабаси Абхиджит Дипке ушбу ифодани сатирик сиёсий ҳаракатга айлантирган.
“Тараканлар партияси” тез орада интернетда оммалашиб, миллионлаб обуначиларни тўплади. Ҳаракат тарафдорлари ишсизлик, коррупция ва таълим тизимидаги муаммоларга эътибор қаратишни талаб қилиб келмоқда.
Шанба кунги намойишда асосий талаб сифатида таълим вазири Дхармендра Прадҳаннинг истеъфоси илгари сурилди. Бироқ акция тез орада кенгайиб, ёшларнинг иқтисодий қийинчиликлари ва келажак имкониятлари чекланганига қарши умумий норозиликка айланди.
Иштирокчилар “Тараканлар келяпти — Дхармендра Прадҳан кетяпти!” деган шиорлар билан чиқиш қилиб, ҳукуматни ёшлар муаммоларига эътибор қаратишга чақиришди.
