O'zbekiston milliy terma jamoasi Jahon chempionati oldidan o'tkazilgan navbatdagi o'rtoqlik uchrashuvida Niderlandiyaga mag'lub bo'ldi.
Bugun, 9 iyunga o'tar kechasi Fabio Kannavaro boshchiligidagi O'zbekiston terma jamoasi Niderlandiyaga qarshi maydonga tushdi. Qiziqarli va keskin kurashlarga boy kechgan bahs niderlandlarning 2:1 hisobidagi g'alabasi bilan yakunlandi.
Uyinning dastlabki daqiqalaridanoq Niderlandiya terma jamoasi tashabbusni o'z qo'liga olib, bir qator xavfli vaziyatlar yaratdi. Biroq ular uzoq vaqt hisobni ocha olmadi. Uchrashuvning 32-daqiqasida Jahongir O'rozov tomonidan ishlangan qoidabuzarlikdan keyin bosh hakam penalti belgiladi. Undan samarali foydalangan Kodi Gakpo hisobni ochdi.
O'zbekistonlik futbolchilar ikkinchi bo'limda hisobni tenglashtirish uchun harakat qildi va buning uddasidan ham chiqdi. Asosiy vaqtga qo'shib berilgan daqiqalarda tajribali hujumchi Igor Sergeyev raqib darvozasini ishg'ol etib, hisobni 1:1 ko'rinishiga keltirdi.
Biroq o'yin dramatik tarzda yakunlandi. Qo'shimcha vaqtning 90+8-daqiqasida Kodi Gakpo yana bir bor gol urdi va dubl qayd etib, o'z jamoasiga g'alaba keltirdi.
Shu tariqa O'zbekiston milliy terma jamoasi Shimoliy Amerikadagi yig'in doirasidagi ikkinchi o'rtoqlik uchrashuvida ham mag'lubiyatga uchradi. Bundan avval, 2 iyun kuni Kannavaro shogirdlari Kanada terma jamoasiga 0:2 hisobida imkoniyatni boy bergan edi.
Niderlandiya uchun ham mazkur bahs Jahon chempionati oldidan o'tkazilgan ikkinchi sinov uchrashuvi bo'ldi. Niderlandlar avvalroq, 3 iyun kuni Jazoirga qarshi kechgan o'rtoqlik bahsida 0:1 hisobida mag'lub bo'lgan edi.
