Ўзбекистон миллий терма жамоаси Жаҳон чемпионати олдидан ўтказилган навбатдаги ўртоқлик учрашувида Нидерландияга мағлуб бўлди.
Бугун, 9 июнга ўтар кечаси Фабио Каннаваро бошчилигидаги Ўзбекистон терма жамоаси Нидерландияга қарши майдонга тушди. Қизиқарли ва кескин курашларга бой кечган баҳс нидерландларнинг 2:1 ҳисобидаги ғалабаси билан якунланди.
Уйиннинг дастлабки дақиқалариданоқ Нидерландия терма жамоаси ташаббусни ўз қўлига олиб, бир қатор хавфли вазиятлар яратди. Бироқ улар узоқ вақт ҳисобни оча олмади. Учрашувнинг 32-дақиқасида Жаҳонгир Ўрозов томонидан ишланган қоидабузарликдан кейин бош ҳакам пенальти белгилади. Ундан самарали фойдаланган Коди Гакпо ҳисобни очди.
Ўзбекистонлик футболчилар иккинчи бўлимда ҳисобни тенглаштириш учун ҳаракат қилди ва бунинг уддасидан ҳам чиқди. Асосий вақтга қўшиб берилган дақиқаларда тажрибали ҳужумчи Игорь Сергеев рақиб дарвозасини ишғол этиб, ҳисобни 1:1 кўринишига келтирди.
Бироқ ўйин драматик тарзда якунланди. Қўшимча вақтнинг 90+8-дақиқасида Коди Гакпо яна бир бор гол урди ва дубль қайд этиб, ўз жамоасига ғалаба келтирди.
Шу тариқа Ўзбекистон миллий терма жамоаси Шимолий Америкадаги йиғин доирасидаги иккинчи ўртоқлик учрашувида ҳам мағлубиятга учради. Бундан аввал, 2 июнь куни Каннаваро шогирдлари Канада терма жамоасига 0:2 ҳисобида имкониятни бой берган эди.
Нидерландия учун ҳам мазкур баҳс Жаҳон чемпионати олдидан ўтказилган иккинчи синов учрашуви бўлди. Нидерландлар аввалроқ, 3 июнь куни Жазоирга қарши кечган ўртоқлик баҳсида 0:1 ҳисобида мағлуб бўлган эди.
