Farg'ona viloyatida bir guruh shaxslar “Soliq Mobile” ilovasi orqali davlat budjeti mablag'larini noqonuniy o'zlashtirgani fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma'lum qilinishicha, Departamentning Farg'ona viloyati boshqarmasi tomonidan o'tkazilgan tergovga qadar tekshiruv davomida fuqarolar M.X., M.X. va K.I. o'zaro til biriktirib harakat qilgani aniqlangan.
Ular “Telegram” ijtimoiy tarmog'ida turli nomlar ostida guruhlar tashkil etib, ushbu platformalar orqali xarid cheklari uchun taqdim etiladigan keshbek summalarini onlayn tarzda sotish bilan shug'ullangan. Sxema doirasida yettita mas'uliyati cheklangan jamiyat nomidan hech qanday haqiqiy moliyaviy operatsiyalar amalga oshirilmagan bo'lsa-da, mahsulot va xizmatlar go'yoki 3,3 trillion so'mga sotilgani haqida soxta elektron hisob-fakturalar rasmiylashtirilgan.
Shuningdek, savdodan tushgan mablag'lar onlayn nazorat-kassa mashinalari orqali kirim qilingani haqida soxta ma'lumotlar shakllantirilib, xarid cheklari rasmiylashtirilgan.
Oqibatda 211 ming 584 nafar fuqaro nomiga “Soliq Mobile” ilovasi orqali jami 28,5 milliard so'm keshbek hisoblangan. Uning 3,2 milliard so'mi to'lab berilgan bo'lib, ushbu mablag'lar budjet mablag'larini o'zlashtirish va rastrata qilish yo'li bilan talon-toroj qilingani qayd etilgan.
Mazkur holat yuzasidan Jinoyat kodeksining 167-moddasi (o'zlashtirish yoki rastrata yo'li bilan talon-toroj qilish) hamda 228-moddasi (hujjatlarni qalbakilashtirish va ulardan foydalanish) bilan jinoyat ishi qo'zg'atilgan.
