Фарғона вилоятида бир гуруҳ шахслар “Soliq Mobile” иловаси орқали давлат бюджети маблағларини ноқонуний ўзлаштиргани фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Департаментнинг Фарғона вилояти бошқармаси томонидан ўтказилган терговга қадар текширув давомида фуқаролар М.Х., М.Х. ва К.И. ўзаро тил бириктириб ҳаракат қилгани аниқланган.
Улар “Телеграм” ижтимоий тармоғида турли номлар остида гуруҳлар ташкил этиб, ушбу платформалар орқали харид чеклари учун тақдим этиладиган кэшбек суммаларини онлайн тарзда сотиш билан шуғулланган. Схема доирасида еттита масъулияти чекланган жамият номидан ҳеч қандай ҳақиқий молиявий операциялар амалга оширилмаган бўлса-да, маҳсулот ва хизматлар гўёки 3,3 триллион сўмга сотилгани ҳақида сохта электрон ҳисоб-фактуралар расмийлаштирилган.
Шунингдек, савдодан тушган маблағлар онлайн назорат-касса машиналари орқали кирим қилингани ҳақида сохта маълумотлар шакллантирилиб, харид чеклари расмийлаштирилган.
Оқибатда 211 минг 584 нафар фуқаро номига “Soliq Mobile” иловаси орқали жами 28,5 миллиард сўм кэшбек ҳисобланган. Унинг 3,2 миллиард сўми тўлаб берилган бўлиб, ушбу маблағлар бюджет маблағларини ўзлаштириш ва растрата қилиш йўли билан талон-торож қилингани қайд этилган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 228-моддаси (ҳужжатларни қалбакилаштириш ва улардан фойдаланиш) билан жиноят иши қўзғатилган.
