Italiya prokuraturasi Isroilning milliy xavfsizlik vaziri Itamar Ben-Gvirga nisbatan tergov boshladi. Bu haqda Reuters agentligi xabar bermoqda.
Ma'lum qilinishicha, surishtiruv G'azo sektoriga insonparvarlik yordamini etkazish maqsadida yo'lga chiqqan gumanitar flotiliya ishtirokchilarining qo'lga olinishi va ularga nisbatan munosabat bilan bog'liq holatlar yuzasidan olib borilmoqda.
Rim prokuraturasi tergovi Ben-Gvirning faollar Isroilning Ashdod portida saqlangan vaqtdagi harakatlariga qaratilgan. Xabarlarga ko'ra, ushbu paytda faollar qo'llari orqadan bog'langan holda ushlab turilgan.
Tergov doirasida Isroil rasmiylarining kemalarni ko'zdan kechirish va faollarni hibsga olish jarayonidagi harakatlari ham o'rganilmoqda. Qo'lga olinganlar orasida Italiya fuqarolari ham bo'lgan.
Prokuratura ehtimoliy qiynoqlar va odam o'g'irlash bilan bog'liq holatlarni ham huquqiy jihatdan baholamoqda.
Bundan avval Rim prokuraturasi G'azoga insonparvarlik yordami olib ketayotgan flotiliyaning Gretsiya yaqinidagi xalqaro suvlarda to'xtatilishi vaqtida Italiya fuqarolari ushlangani yuzasidan ham alohida tergov boshlagan edi. Bu uchta rasmiy shikoyat ortidan amalga oshirilgan.
Eslatib o'tamiz, may oyi o'rtalarida Isroil harbiy-dengiz kuchlari G'azo tomon yo'l olgan "Sumud" gumanitar flotiliyasini xalqaro suvlarda to'xtatgan edi. Keyinchalik tarqatilgan videolarda qo'lga olingan faollar tiz cho'ktirilgan, qo'llari plastik bog'ichlar bilan bog'langan holda aks etgani xalqaro maydonda keng muhokamalarga sabab bo'lgan.
Shuningdek, ijtimoiy tarmoqlarda tarqalgan tasvirlarda Itamar Ben-Gvir qo'lga olingan faollar oldidan o'tib, Isroil bayrog'ini hilpiratayotgani ko'ringan. Ushbu kadrlar keskin tanqidlarga uchraganidan so'ng, flotiliya ishtirokchilari ozod qilingan.
