Eron Quvayt, Iordaniya va Bahrayn hududida joylashgan AQSh harbiy ob'ektlariga raketa zarbalari bergani haqida xabarlar tarqaldi. Bu haqda qator xalqaro ommaviy axborot vositalari va ijtimoiy tarmoqlarda e'lon qilingan videolarda aytilmoqda.
Xabarlarga ko'ra, zarbalar fonida Livandagi "Hizbulloh" harakati ham Isroil hududiga qarshi hujumlarni boshlagan. Hozircha mazkur ma'lumotlar bo'yicha rasmiy idoralarning to'liq bayonotlari e'lon qilinmagan.
Ayrim manbalar Vashington javob tariqasida Eron hududidagi nishonlarga "Tomahawk" turidagi qanotli raketalarni uchirganini bildirmoqda. Shu bilan birga, Isroil hukumati hozircha Eronga qarshi to'g'ridan-to'g'ri zarbalarda ishtirok etmayotganini ma'lum qilgan. Biroq mamlakat rahbariyati Livan hududidan bo'layotgan hujumlarga nisbatan qat'iy javob choralari ko'rilishi mumkinligini bildirgan.
Yaqin Sharqdagi vaziyat so'nggi kunlarda yanada keskinlashmoqda. Kuzatuvchilar fikricha, bir vaqtning o'zida bir nechta frontda yuzaga kelayotgan to'qnashuvlar mintaqada keng ko'lamli harbiy qarama-qarshilik xavfini oshirmoqda.
Mavjud vaziyat AQSh ma'muriyati uchun ham jiddiy sinov sifatida baholanmoqda. Xalqaro hamjamiyat esa mojaroning yanada kengayib ketishi va butun mintaqa xavfsizligiga salbiy ta'sir ko'rsatishidan xavotir bildirmoqda.
