O'zbekistonliklar uchun xorijiy kompaniyalar aksiyalarini sotib olish imkoniyatlari kengaymoqda. Bu haqda Markaziy bank boshqaruvining joriy yil 2 iyun kuni qabul qilingan va 15 iyun kuni ro'yxatdan o'tkazilgan "Kapital harakati bilan bog'liq ayrim valyuta operatsiyalarini amalga oshirish tartibi to'g'risidagi nizomga o'zgartirishlar kiritish haqida"gi qarorida ma'lum qilindi.
Hujjatga ko'ra, endilikda jismoniy shaxslar bir kalendar yil davomida 10 ming AQSh dollari ekvivalentidan oshmaydigan miqdorda xorijda investitsiya faoliyatini amalga oshirishi, ya'ni chet el kompaniyalarining ustav kapitalida ishtirok etishi yoki ulushli ishtirok olishiga ruxsat beriladi.
Shuningdek, xorijiy brokerlik yoki investitsiya hisobvaraqlarini to'ldirish uchun pul mablag'larini o'tkazish faqat tegishli litsenziyaga ega bo'lgan investitsiya vositachilari orqali amalga oshiriladi.
Bundan tashqari, davlat ulushi mavjud korxonalar va ularning sho'ba tashkilotlari bir kalendar yil davomida 100 ming AQSh dollarigacha, davlat ulushi mavjud bo'lmagan korxonalar esa 200 ming AQSh dollarigacha xorijda investitsiya faoliyatini amalga oshirishi mumkin bo'ladi.
Yana bir jihat — davlat ulushi mavjud korxonalar uchun 50 ming dollar, davlat ulushi bo'lmagan korxonalar uchun esa 100 ming dollargacha mablag'ni xorijdagi filial va vakolatxonalarning aylanma mablag'lari sifatida yo'naltirish imkoniyati yaratiladi.
Qarorga ko'ra, rezidentlar xorijdagi investitsiya faoliyati bo'yicha ma'lumotlarni har chorakda xizmat ko'rsatuvchi banklarga taqdim etib borishi shart. Ma'lumotlar o'z vaqtida taqdim etilmasa, operatsiyalar vaqtincha to'xtatib qo'yilishi mumkin.
