Ўзбекистонликлар учун хорижий компаниялар акцияларини сотиб олиш имкониятлари кенгаймоқда. Бу ҳақда Марказий банк бошқарувининг жорий йил 2 июнь куни қабул қилинган ва 15 июнь куни рўйхатдан ўтказилган “Капитал ҳаракати билан боғлиқ айрим валюта операцияларини амалга ошириш тартиби тўғрисидаги низомга ўзгартиришлар киритиш ҳақида”ги қарорида маълум қилинди.
Ҳужжатга кўра, эндиликда жисмоний шахслар бир календарь йил давомида 10 минг АҚШ доллари эквивалентидан ошмайдиган миқдорда хорижда инвестиция фаолиятини амалга ошириши, яъни чет эл компанияларининг устав капиталида иштирок этиши ёки улушли иштирок олишига рухсат берилади.
Шунингдек, хорижий брокерлик ёки инвестиция ҳисобварақларини тўлдириш учун пул маблағларини ўтказиш фақат тегишли лицензияга эга бўлган инвестиция воситачилари орқали амалга оширилади.
Бундан ташқари, давлат улуши мавжуд корхоналар ва уларнинг шўъба ташкилотлари бир календарь йил давомида 100 минг АҚШ долларигача, давлат улуши мавжуд бўлмаган корхоналар эса 200 минг АҚШ долларигача хорижда инвестиция фаолиятини амалга ошириши мумкин бўлади.
Яна бир жиҳат — давлат улуши мавжуд корхоналар учун 50 минг доллар, давлат улуши бўлмаган корхоналар учун эса 100 минг долларгача маблағни хориждаги филиал ва ваколатхоналарнинг айланма маблағлари сифатида йўналтириш имконияти яратилади.
Қарорга кўра, резидентлар хориждаги инвестиция фаолияти бўйича маълумотларни ҳар чоракда хизмат кўрсатувчи банкларга тақдим этиб бориши шарт. Маълумотлар ўз вақтида тақдим этилмаса, операциялар вақтинча тўхтатиб қўйилиши мумкин.
