Isroilning G‘azo sektoriga bergan navbatdagi havo zarbalari oqibatida kamida olti kishi halok bo‘ldi. Qurbonlar orasida Al Jazeera telekanali operatori Ahmad Vishah ham bor. Sog‘liqni saqlash rasmiylari va qutqaruv xizmatlari ma’lumotlariga tayanib, BBC xabar berdi.
Telekanal tarqatgan bayonotda jurnalistning o‘limi qat’iy qoralanib, bu holat jurnalistlarni nishonga olish va haqiqat ovozini o‘chirishga qaratilgan harakat sifatida baholangan.
Isroil mudofaa kuchlari (IDF) esa Ahmad Vishahni HAMASning harbiy qanotida snayper bo‘lganlikda aybladi. Biroq Isroil tomoni mazkur da’voni tasdiqlovchi dalillarni ochiqlamagan.
Mahalliy tibbiyot muassasalari va qutqaruv xizmatlari ma’lumotiga ko‘ra, G‘azo markazidagi Bureyj qochqinlar lagerida joylashgan uyga berilgan zarba oqibatida Vishah bilan birga yana ikki kishi halok bo‘lgan.
Shu bilan birga, G‘azo shahrining Sabra mahallasidagi turar joyga qilingan hujum natijasida bir oilaning to‘rt a’zosi, jumladan bolalar ham qurbon bo‘lgan. Qarindoshlarining ta’kidlashicha, halok bo‘lganlar har qanday qurolli guruhlar bilan aloqador bo‘lmagan tinch aholi vakillari bo‘lgan.
G‘azodagi sog‘liqni saqlash vazirligi ma’lumotlariga ko‘ra, o‘t ochishni to‘xtatish bo‘yicha kelishuv kuchga kirganidan buyon Isroil harbiy amaliyotlari oqibatida 1000 dan ortiq kishi halok bo‘lgan.
Ayni vaqtda Isroil va HAMAS bir-birini tinchlik kelishuvi shartlarini buzishda ayblashda davom etmoqda. Vaziyat keskinligicha qolmoqda.
