Toshkent viloyatining Bo'stonliq tumanida "Bo'zsuv" kanaliga tushib ketgan ikki boladan birining jasadi topildi. Bu haqda Favqulodda vaziyatlar vazirligi xabar berdi.
Ma'lum qilinishicha, joriy yilning 17 iyun kuni Bo'stonliq tumanidagi "Obod" mahallasida yashovchi 2016 yilda tug'ilgan K.Y. va 2018 yilda tug'ilgan K.B. ismli ikki nafar voyaga yetmagan bola yashash uyi yaqinidan oqib o'tuvchi "Bo'zsuv" kanaliga ehtiyotsizlik oqibatida tushib ketgan.
Hodisa yuzasidan Toshkent viloyati Favqulodda vaziyatlar boshqarmasiga xabar kelib tushgach, qidiruv-qutqaruv ishlari boshlangan.
Qayd etilishicha, g'avvos-qutqaruvchilar tomonidan olib borilgan qidiruv ishlari davomida 21 iyun kuni bolalardan birining jasadi suvdan olib chiqilgan.
Ayni vaqtda ikkinchi bolani qidirish ishlari davom ettirilmoqda. Qutqaruvchilar tomonidan qidiruv-qutqaruv tadbirlari uzluksiz ravishda olib borilmoqda.
