O‘zbekistonning turli hududlarida fuqarolarni Janubiy Koreyaga ishga jo‘natishni va’da qilib, ularning pullarini o‘zlashtirgan shaxslar fosh etildi. Bu haqda Bosh prokuratura huzuridagi Departament xabar berdi.
Ma’lum qilinishicha, Departamentning Toshkent viloyati boshqarmasi tomonidan o‘tkazilgan tergovga qadar tekshiruvda fuqaro T.T. 12 nafar fuqaroning ishonchiga kirib, ularni Koreya Respublikasiga ishga jo‘natishini aytgan hamda shu tariqa 38 ming AQSH dollarini firibgarlik yo‘li bilan qo‘lga kiritgani aniqlangan. Ushbu mablag‘larning muqaddam Migratsiya agentligida ishlagan, Jinoyat kodeksining 168 va 211-moddalari bilan avval sudlangan A.A.ga berilgani ma’lum bo‘lgan.
Marg‘ilon shahrida aniqlangan holatda esa muqaddam sudlangan I.R. ikki nafar fuqaroni Koreyaga ishga yuborishni va’da qilib, ulardan jami 3,5 ming AQSH dollarini olgan. Tergov jarayonida mazkur mablag‘ning 3 million so‘mi qaytarilgan.
Qashqadaryo viloyatining Dehqonobod tumanida fuqarolar I.X. va A.K. Migratsiya agentligida ishlovchi tanishlari orqali Koreyaga ishga jo‘natishni va’da qilib, bir fuqarodan 2 ming AQSH dollari hamda 36 million so‘mni firibgarlik yo‘li bilan olgani ma’lum bo‘lgan. I.X. muqaddam Jinoyat kodeksining 168-moddasi bilan sudlangan.
Andijon viloyatining Xonobod shahrida muqaddam sudlangan A.A. uch nafar fuqaroga Koreya uchun viza rasmiylashtirib berishini aytib, 2,5 ming AQSH dollari va 11 million so‘mni qo‘lga kiritgan. Keyinchalik ushbu mablag‘ning 1 ming AQSH dollari qaytarilgan.
Jizzax viloyatining Do‘stlik tumanida muqaddam sudlangan Yu.L. fuqaro U.F.ni tanishlari orqali Koreyaga ishga jo‘natishni va’da qilib, kelishilgan 11 ming AQSH dollaridan 2,3 ming AQSH dollarini olgani aniqlangan.
Xorazm viloyatining Bog‘ot tumanida esa X.K. fuqaroni Koreyaga ishga ketish uchun topshiriladigan imtihonlardan muvaffaqiyatli o‘tkazib berishini aytib, kelishilgan 3,5 ming AQSH dollaridan 1 ming AQSH dollarini firibgarlik yo‘li bilan olgan.
Qayd etilishicha, mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilgan bo‘lib, hozirda tergov harakatlari olib borilmoqda.
