Ўзбекистоннинг турли ҳудудларида фуқароларни Жанубий Кореяга ишга жўнатишни ваъда қилиб, уларнинг пулларини ўзлаштирган шахслар фош этилди. Бу ҳақда Бош прокуратура ҳузуридаги Департамент хабар берди.
Маълум қилинишича, Департаментнинг Тошкент вилояти бошқармаси томонидан ўтказилган терговга қадар текширувда фуқаро Т.Т. 12 нафар фуқаронинг ишончига кириб, уларни Корея Республикасига ишга жўнатишини айтган ҳамда шу тариқа 38 минг АҚШ долларини фирибгарлик йўли билан қўлга киритгани аниқланган. Ушбу маблағларнинг муқаддам Миграция агентлигида ишлаган, Жиноят кодексининг 168 ва 211-моддалари билан аввал судланган А.А.га берилгани маълум бўлган.
Марғилон шаҳрида аниқланган ҳолатда эса муқаддам судланган И.Р. икки нафар фуқарони Кореяга ишга юборишни ваъда қилиб, улардан жами 3,5 минг АҚШ долларини олган. Тергов жараёнида мазкур маблағнинг 3 миллион сўми қайтарилган.
Қашқадарё вилоятининг Деҳқонобод туманида фуқаролар И.Х. ва А.К. Миграция агентлигида ишловчи танишлари орқали Кореяга ишга жўнатишни ваъда қилиб, бир фуқародан 2 минг АҚШ доллари ҳамда 36 миллион сўмни фирибгарлик йўли билан олгани маълум бўлган. И.Х. муқаддам Жиноят кодексининг 168-моддаси билан судланган.
Андижон вилоятининг Хонобод шаҳрида муқаддам судланган А.А. уч нафар фуқарога Корея учун виза расмийлаштириб беришини айтиб, 2,5 минг АҚШ доллари ва 11 миллион сўмни қўлга киритган. Кейинчалик ушбу маблағнинг 1 минг АҚШ доллари қайтарилган.
Жиззах вилоятининг Дўстлик туманида муқаддам судланган Ю.Л. фуқаро У.Ф.ни танишлари орқали Кореяга ишга жўнатишни ваъда қилиб, келишилган 11 минг АҚШ долларидан 2,3 минг АҚШ долларини олгани аниқланган.
Хоразм вилоятининг Боғот туманида эса Х.К. фуқарони Кореяга ишга кетиш учун топшириладиган имтиҳонлардан муваффақиятли ўтказиб беришини айтиб, келишилган 3,5 минг АҚШ долларидан 1 минг АҚШ долларини фирибгарлик йўли билан олган.
Қайд этилишича, мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилган бўлиб, ҳозирда тергов ҳаракатлари олиб борилмоқда.
