Prezident Shavkat Mirziyoyev bugun, 25 iyun kuni o‘tkazilayotgan videoselektor yig‘ilishida Toshkent xalqaro investitsiya forumi doirasida erishilgan 43 milliard dollarlik kelishuvlar amaliy natija berishi shartligini ta’kidladi.
Davlat rahbari avvalo o‘tgan hafta yuqori saviyada tashkil etilgan beshinchi Toshkent xalqaro investitsiya forumi yakunlariga to‘xtalib, forum doirasida xorijiy hamkorlar bilan umumiy qiymati 43 milliard dollar bo‘lgan 177 ta kelishuv imzolanganini qayd etdi.
“Har bir kelishuv loyihaga, ish o‘rniga va yuqori qo‘shilgan qiymatga aylanishi shart”, dedi Prezident.
Shu munosabat bilan mutasaddilarga xorijiy investorlar tomonidan bildirilgan 120 ta taklif yuzasidan aniq yechimlar ishlab chiqish va tegishli qarorlar kiritish vazifasi yuklatildi.
Yig‘ilishda investitsiyalarni jalb qilish bilan bir qatorda ularning iqtisodiy samaradorligini oshirish masalasi ham ko‘tarildi. Qayd etilishicha, so‘nggi besh yilda mamlakatga kiritilgan investitsiyalarning qariyb yarmi to‘rtta hudud hissasiga to‘g‘ri kelgan.
Biroq investitsiyalarning iqtisodiyotga qaytimi hududlar kesimida keskin farq qilmoqda. Xususan, 1 million so‘mlik investitsiya Farg‘ona viloyati yalpi hududiy mahsulotiga qo‘shimcha 273 ming so‘m, Samarqand viloyatida esa 262 ming so‘m qo‘shilgan qiymat yaratayotgan bo‘lsa, Buxoro viloyatida bu ko‘rsatkich atigi 117 ming so‘mni tashkil etmoqda.
Prezident bunday tafovutlar investitsiya sifati va samaradorligiga bo‘lgan yondashuvni qayta ko‘rib chiqish zarurligini ko‘rsatishini ta’kidladi.
