Президент Шавкат Мирзиёев бугун, 25 июнь куни ўтказилаётган видеоселектор йиғилишида Тошкент халқаро инвестиция форуми доирасида эришилган 43 миллиард долларлик келишувлар амалий натижа бериши шартлигини таъкидлади.
Давлат раҳбари аввало ўтган ҳафта юқори савияда ташкил этилган бешинчи Тошкент халқаро инвестиция форуми якунларига тўхталиб, форум доирасида хорижий ҳамкорлар билан умумий қиймати 43 миллиард доллар бўлган 177 та келишув имзоланганини қайд этди.
“Ҳар бир келишув лойиҳага, иш ўрнига ва юқори қўшилган қийматга айланиши шарт”, деди Президент.
Шу муносабат билан мутасаддиларга хорижий инвесторлар томонидан билдирилган 120 та таклиф юзасидан аниқ ечимлар ишлаб чиқиш ва тегишли қарорлар киритиш вазифаси юклатилди.
Йиғилишда инвестицияларни жалб қилиш билан бир қаторда уларнинг иқтисодий самарадорлигини ошириш масаласи ҳам кўтарилди. Қайд этилишича, сўнгги беш йилда мамлакатга киритилган инвестицияларнинг қарийб ярми тўртта ҳудуд ҳиссасига тўғри келган.
Бироқ инвестицияларнинг иқтисодиётга қайтими ҳудудлар кесимида кескин фарқ қилмоқда. Хусусан, 1 миллион сўмлик инвестиция Фарғона вилояти ялпи ҳудудий маҳсулотига қўшимча 273 минг сўм, Самарқанд вилоятида эса 262 минг сўм қўшилган қиймат яратаётган бўлса, Бухоро вилоятида бу кўрсаткич атиги 117 минг сўмни ташкил этмоқда.
Президент бу каби тафовутлар инвестиция сифати ва самарадорлигига бўлган ёндашувни қайта кўриб чиқиш зарурлигини кўрсатишини таъкидлади.
