АҚШ президенти Дональд Трамп Исроил ва Ливан ўртасидаги ўт очишни тўхтатиш режими яна уч ҳафтага узайтирилишини маълум қилди. Унинг сўзларига кўра, бу қарор Вашингтонда бўлиб ўтган самарали музокаралар натижасида қабул қилинган.
Трамп яқин вақтда Исроил бош вазири Биньямин Нетаньяҳу ва Ливан президенти Жозеф Аун билан учрашув ўтказишни режалаштираётганини айтди. У мазкур мулоқотни “тарихий” деб атади.
Оқ уйдаги учрашувда АҚШ вице-президенти Жей Ди Вэнс, давлат котиби Марко Рубио ҳамда АҚШнинг минтақадаги элчилари иштирок этган. Музокаралар якунида Рубио Исроил ва Ливанни “бир хил террор ташкилоти қурбони” деб атаб, “Ҳизбуллоҳ”ни назарда тутган.
Шу билан бирга, Трамп агар Исроилга қарши ҳужумлар давом этса, мамлакат ўзини ҳимоя қилишга мажбур бўлишини таъкидлади. Сўнгги маълумотларга кўра, Исроил мудофаа кучлари “Ҳизбуллоҳ” томонидан учирилган ракеталарни тутиб қолган.
