Ijtimoiy tarmoqlarda “O'rikzor” bozorida yong'in chiqqanligi haqida tarqalgan xabarlar yuzasidan rasmiy ma'lumot berildi.
Toshkent shahar Favqulodda vaziyatlar boshqarmasiga 4 iyul kuni soat 04:26 da Uchtepa tumani, Toshkent halqa avtomobil yo'li ko'chasida joylashgan “O'rikzor” bozoridagi do'konlardan birida yong'in sodir bo'layotgani haqida xabar kelib tushgan.
Shunga ko'ra, qutqaruv bo'linmalari soat 04:35 da hodisa joyiga yetib borgan. Yong'in soat 04:48 da qurshab olingan va 05:01 da to'liq bartaraf etilgan.
Yong'in oqibatida oziq-ovqat do'koni 150 kvadrat metr maydoni zarar ko'rgan.
Hodisa natijasida jabrlanganlar yo'q.
Hozirda yong'inning kelib chiqish sabablari hamda moddiy zarar miqdori aniqlanmoqda.
