Bugun, 2 may kuni Navoiy viloyati Konimex tumani hududida yo‘l-transport hodisasi sodir bo‘lib, unda ikki nafar fuqaro vafot etdi. Bu haqda viloyat Ichki ishlar boshqarmasi ma’lum qildi.
Xabarga ko‘ra, soat 07:20 atrofida A-379 “Navoiy–Uchquduq” yo‘nalishidagi avtomobil yo‘lining 142–143 kilometrlari oralig‘ida Nexia-3 avtomobili haydovchisi N.J. tezlikni oshirib harakatlangan. U xavfli burilishda rulni boshqara olmay qolib, qarama-qarshi yo‘nalishga chiqib ketgan.
Natijada u SKANIA 114L yuk avtomobili bilan to‘qnashgan. Yuk mashinasi M.A. tomonidan boshqarilayotgan bo‘lgan.
YTH oqibatida Nexia-3 haydovchisi va uning yo‘lovchisi og‘ir jarohatlar olib, voqea joyida halok bo‘lgan.
Hozirda holat yuzasidan jinoyat ishi qo‘zg‘atilgan bo‘lib, dastlabki tergov harakatlari davom etmoqda.
