Маълум қилинишича, воқеа 6 июль куни эрталаб соат 08:30–08:50 оралиғида содир бўлган. Жабрланувчининг айтишича, автобус деярли бўш бўлган. Дастлаб эркак унинг ёнига ўтирган, бироқ ундан келаётган нохуш ҳид сабабли аёл бошқа ўриндиққа ўтган.
Шундан сўнг эркак оёқларини кенг очиб, жамоат жойида ахлоқ қоидаларига зид ҳаракатларни содир эта бошлаган. Вазиятдан шубҳаланган аёл мобил телефони орқали уни тасвирга олишни бошлаган. Унинг сўзларига кўра, эркак бир неча бор ҳаракатини тўхтатган бўлса-да, яна давом эттирган.
Шундан кейин аёл унга эътироз билдириб, бу ҳаракатларини интернетда эълон қилишини айтган. Эркак эса гап унга қаратилган-қаратилмаганини сўраган. Аёл бу ҳаракатлар айнан унга тегишли эканини билдирганидан сўнг, автобус бекатга яқинлашганда эркак йўл ҳақини тўламасдан тушиб кетган.
Жабрланувчи бу каби ҳолатлар айниқса вояга етмаган қизлар учун жиддий руҳий оқибатларга олиб келиши мумкинлигини таъкидлаб, айбдор шахс жавобгарликка тортилиши лозимлигини қайд этган.
Ҳозирча ушбу ҳолат юзасидан ҳуқуқни муҳофаза қилувчи органлар расмий маълумот бермаган. Воқеа ижтимоий тармоқларда кенг муҳокама қилинмоқда.
