Toshkent shahridagi Mustaqillik shoh ko‘chasida asfalt yotqizish ishlarining ikkinchi bosqichi yakunlanishi munosabati bilan ayrim ko‘chalarda transport harakati vaqtincha cheklanadi.
Toshkent shahar Yo‘l harakatini tashkil etish markazi ma’lum qilishicha, cheklovlar 2026-yil 31-iyul soat 23:00 dan 3-avgust soat 22:00 gacha amal qiladi.
Ushbu vaqt oralig‘ida quyidagi yo‘l uchastkalari barcha turdagi transport vositalari uchun yopiladi:
Oqqo‘rg‘on ko‘chasining Mustaqillik shoh ko‘chasi bilan kesishmasidan Osiyo ko‘chasi kesishmasigacha bo‘lgan qismi;
Parkent ko‘chasining Mustaqillik shoh ko‘chasi bilan kesishmasidan Parkent-2 ko‘chasi kesishmasigacha bo‘lgan qismi.
Ma’lum qilinishicha, harakat cheklovlari asfalt yotqizish ishlarini sifatli va xavfsiz yakunlash, yo‘l infratuzilmasini bosqichma-bosqich yaxshilash hamda transport harakati xavfsizligini ta’minlash maqsadida joriy etilmoqda.
Mas’ullar haydovchilardan yuzaga kelishi mumkin bo‘lgan noqulayliklar uchun uzr so‘rab, yo‘nalishlarni oldindan rejalashtirishni tavsiya qildi.
