Eron Tashqi ishlar vazirligi matbuot kotibi Esmoil Baqoiyning ta'kidlashicha, kelishuvda Tehronni xavotirga soladigan qoidalar mavjud emas.
“Uch davlat — Turkiya, Pokiston va Saudiya Arabistoni bilan bizni chuqur diniy, tarixiy va sivilizatsion rishtalar bog'lab turadi. Shuning uchun ushbu kelishuv Eronga qarshi qaratilganidan xavotirlanishimizga asos yo'q”, — dedi Baqoiy haftalik matbuot anjumanida.
Uning so'zlariga ko'ra, Eron Turkiya va Pokiston xalqlari bilan do'stona hamda madaniy aloqalarga ega. Baqoiy kelishuvni mintaqadagi davlatlarning o'z xavfsizligini ta'minlashda AQSh va boshqa tashqi kuchlarga qaram bo'lib qolmaslikka intilayotganining belgisi sifatida baholagan.
Kelishuv nimani nazarda tutadi?
Turkiya Prezidenti Rajab Toyyib Erdo'g'an, Saudiya Arabistoni Valiahd shahzodasi va Bosh vaziri Muhammad bin Salmon hamda Pokiston Bosh vaziri Shahboz Sharif 7 avgust kuni Makkada uch davlat o'rtasidagi Mudofaa sohasida hamkorlik to'g'risidagi kelishuvni imzoladi.
Hujjat biror davlatga qarshi qaratilmaganini va asosiy maqsad mintaqaviy hamda xalqaro tinchlik, barqarorlik va farovonlikni ta'minlash ekanini belgilaydi.
Kelishuvning asosiy qoidalaridan biriga ko'ra, uch davlatdan biriga qilingan har qanday qurolli hujum uchala davlatga qilingan tajovuz sifatida baholanadi.
Shuningdek, Turkiya, Saudiya Arabistoni va Pokiston o'zaro xavfsizlikni qo'llab-quvvatlash, mudofaa sanoatida hamkorlik qilish, shuningdek, qurolli kuchlar o'rtasidagi muvofiqlikni oshirish bo'yicha hamkorlikni kuchaytirishni rejalashtirgan.
