​Qiymati 34,5 mln. so`mlik 45 dona uyali aloqa vositalarini noqonuniy olib kirishga uringan shaxslar aniqlandi

Amaldagi tartiblarga muvofiq, bojxona chegaralarini kesib o`tayotgan jismoniy shaxslar o`zlari bilan olib o`tayotgan tovarlar haqida yo`lovchi bojxona deklarasiyasida va bojxona xodimining og`zaki so`rovlari paytida ma`lum qilishlari shart. Afsuski, mazkur talablarga rioya ilmay tovar-moddiy boyliklarni yashirin yo`llar bilan olib kirishga urinishlar ham ko`zga tashlanmoqda, deya xabar beradi Davlat bojxona qo`mitasi Axborot xizmati.

O`zbekiston Respublikasi hududiga jismoniy shaxslar tomonidan tovarlarni aksiz solig`i solinmasdan olib kirishning ruxsat etilgan me`yorlariga muvofiq umumiy og`irligi 30 grammdan ortiq bo`lmagan qimmatbaho toshlar va qimmatbaho metaldan tayyorlangan 5 donagcha zargarlik buyumlarini olib kirishga ruxsat etiladi.

Qolaversa. bojxona chegaralarini kesib o`tish paytida to`ldiriladigan yo`lovchi bojxona deklarasiyasida olib o`tilayotgan qimmatbaho zargarlik buyumlarining miqdori aniq ko`rsatilishi shart.

Shunga qaramay Toshkent xalqaro aeroportida Istanbuldan uchib kelgan fuqarolar Otabaeva va Sotiboldievalar (maqoladagi barcha ism shariflar o`zgartirilgan) mazkur tartiblarni buzishga urinishdi. «Toshkent-Aero» ixtisoslashtirilgan bojxona kompleksi xodimlari tomonidan ushbu shaxslar bojxona ko`rigidan o`tkazilganda, ularning qing`ir qilmishlari fosh etildi.

Jumladan fuqaro Sotiboldieva yo`lovchi bojxona deklarasiyasida va bojxona xodimlarining og`zaki so`rovi paytida ma`lum qilmasdan turib, 294 gr. og`irlikdagi tilla va kumushdan tayyorlangan 87 dona zargarlik buyumlarini qo`l yuklari orasiga yashirgan holda olib kirishga uringan paytda to`xtatib qolindi.

Uning hamrohi Otaboevaga esa bojxonachilarning ko`zini shamg`alat qilishga urinib, 61 gr. og`irlikdagi 10 dona tilla taqinchoqlarni egnidagi kiyimlarining cho`ntaklariga yashirgancha olib o`tish rejasi naf bermadi.

Shuningdek, poytaxt aeroporti bojxonachilari “Seul-Toshkent” reysi bo`yicha parvozini yakunlagan fuqaro Bahromovning noqonuniy harakatlariga chek qo`yishdi. Ushbu shaxs ham bojxona nazoratidan yashirgancha 3 turdagi 35 dona qo`l telefonlarini olib kirishni ko`zlagan edi. Ammo, bu reja o`z vaqtida chipakkka chiqarildi.

Xuddi shunday holat Farg`ona viloyati bojxonachilari tomonidan ham aniqlandi. Chegaradosh hududda harakatlanayotgan Neksiya avtomashinasi o`rnatilgan tartibda xolislar ishtirokida ko`zdan kechirilganda, er-xotin Sodiqovalar qiymati 34,5 mln. so`mlik 5 turdagi 45 dona uyali aloqa vositalarini bellariga bog`lab olgancha, qo`shni davlatdan olib kirishga urinishgani aniqlandi.

Eslatib o`tamiz, O`zbekiston Respublikasi hududiga radioelektron vositalari va yuqori chastotali qurilmalarni keltirish to`g`risidagi tartiblarga muvofiq shaxsiy foydalanish uchun mo`ljallangan 1 donadan ortiq uyali aloqa vositalarini olib kirish Elektromagnit moslashuv markazining ruxsatnomasi asosida amalga oshiriladi.

Hozirda mazkur holatlar yuzasidan bojxona tekshiruvlari va surishtiruv harakatlari davom ettirilmoqda.