Rossiyaning Ekaterinburg shahrida metro relsiga yiqilib tushgan bolani begona erkak hayotini xavf ostiga qo`yib qutqardi, deb xabar berdi “Tvzvezda.ru” nashri.
Bola metro relsiga yiqilgandan keyin uni qutqarish uchun yigirma soniya zarur bo`ldi. Bolani relsdan ko`tarib tepaga olib chiqqan erkakni kuzatuv kameralari qayd etgan.
Ikkinchi sinf o`quvchisi bo`lgan bolaning butun diqqat-e`tibori telefonda bo`lgani bois, platformaning chetiga borib qolganini anglamagan. Rels ustiga yiqilgan bola mustaqil ravishda o`rnidan turmoqchi bo`lganda, buni eplolmadi. Bolaning yiqilganini ko`rgan erkak zudlik bilan yordamga shoshildi, u relsga sakrab tushib, bolani yuqoriga uzatdi. Boshqa yo`lovchilar ham uning tepaga chiqishiga yordam berdi. Bola olgan tan jarohati tufayli kasalxonaga yotqizildi. Unga yordam bergan Anton ismli erkak bekatda turgan barcha yo`lovchilar qutqaruv ishlarida qatnashgani uchun o`zini qahramon deb hisoblamadi.
