​Avtobus haydovchilarining qoidabuzarliklari sababli avtokorxonalar 15 million so`m jarima to`ladi

Ma`lumki, Toshkent shahri chorrahalarida 15 martda videokuzatuv kameralari ish boshladi.

Tahlillar dastlabki kunlarning o`zidayoq “Toshshahartransxizmat” aksiyadorlik jamiyati tizimidagi avtokorxona haydovchilari tomonidan 52 ta qoidabuzarlik sodir etilganligini ko`rsatdi. Mazkur qoidabuzarliklar bois jamiyat tarkibidagi avtokorxonalar 15 million so`mdan ortiq jarima to`lashga majbur bo`lgandi, deb yozadi “Poytaxt transport” nashri.

2017 yilning 15 martidan 2017 yilning 14 apreligacha bo`lgan muddatda “Toshshahartransxizmat” aksiyadorlik jamiyati tasarrufidagi avtokorxonalar haydovchilari tomonidan jami 191ta qoidabuzarlik sodir etilganligi qayd qilingan.

Jami qoidabuzarliklar bitta punkt bo`yicha, ya`ni taqiqlangan qizil chiroq belgisiga rioya qilmaslik bo`lib chiqdi. Tezlikni oshirish yuzasidan esa bitta ham jarima yo`q. Hozircha kameralar, asosan, chorrahalarda joylashtirilganligi uchun ham tezlikni oshirgan haydovchilar jarimadan qutulib qolyapti, deyish mumkin.

Kameralar ishga tushganining ikkinchi haftasidan boshlab, ya`ni joriy yilning 6-13 aprel oralig`ida Jamiyat avtokorxonalari haydovchilari tomonidan 22 marta qoidabuzarlik sodir etilgani qayd qilindi. Dastlabki uch hafta davomida 169 ta qoidabuzarlik qayd qilingan bo`lsa, undan keyingi bir hafta davomida atigi 22ta qoidabuzarlik ro`yxatga olindi. Bu avtokorxonalarda haydovchilar bilan targ`ibot ishlari keng olib borilayotganidan darak beradi.