Kasb-hunar kollejlari va oliy o`quv yurtlari bitiruvchilarini tanlab olish va Favqulodda vaziyatlar vazirligi tizimiga ishga qabul qilish tartibi to`g`risidagi nizomni tasdiqlash haqida Favqulodda vaziyatlar vazirligi hamda Oliy va o`rta maxsus ta`lim vazirligining qarori e`lon qilindi.
Ushbu Nizomga ko`ra Kasb-hunar kollejlari va oliy o`quv yurti bitiruvchilarini mutaxassis va qutqaruvchi lavozimlariga ishga qabul qilishda quyidagi talablar qo`yiladi.
a) Oliy o`quv yurti bitiruvchilari:
tabiiy hususiyatli favqulodda vaziyatlar profilaktikasi ishlarini olib borish mutaxassisligiga oliy o`quv yurtlarining tabiiy ta`lim yo`nalishlaridan birini bitirgan bo`lishi kerak (geologiya, geografiya, geofizika, biologiya, gidrologiya, meteorologiya, gidromexanika, quruqlik-gidrologiyasi, atmosfera fizikasi va shu kabi yo`nalishlar);
texnogen xususiyatli favqulodda vaziyatlar profilaktikasi ishlarini olib borish mutaxassisligiga oliy o`quv yurtlarining texnika-texnologiya ta`lim yo`nalishlaridan birini bitirgan bo`lishi kerak (arxitektura, gidrotexnika, muhandislik-irrigasiya, muhandislik-energetika, muhandislik-mexanika, axborot texnologiyasi va shu kabi yo`nalishlar);
radiasion, kimyoviy va biologik (bakteriologik) muhofazasi ishlarini olib borish mutaxassisligiga oliy o`quv yurtlarining fizika (yadro fizikasi), kimyo, kimyo-texnologiya, biologiya, biologiya-kimyo, tibbiyot, radiologiya, sanitar-epidemiologiya, geofizika yo`nalishlaridan birini bitirgan bo`lishi kerak;
moddiy-texnik ta`minot, zaxira va qurilish yo`nalishidagi mutaxassisliklarga oliy o`quv yurtlarining engil va oziq-ovqat sanoati, iqtisodiyot, avtomobil, qurilish yo`nalishlarini bitirgan bo`lishi kerak;
Favqulodda vaziyatlar vazirligining amaldagi ishchi va xizmatchilar asosiy lavozimlar Klassifikatori talablariga muvofiq bo`lishi lozim;
muddatli harbiy xizmatni o`tagan bo`lishi kerak.
b) Kasb-hunar kollejlari bitiruvchilari:
mutaxassis-qutqaruvchi lavozimiga (dizenfeksiya instruktori, dozimetrist, gazdan qutqaruvchi va shu kabi barcha qutqaruvchi lavozimlariga):
yoshi 18 dan kichik 30 yoshdan katta bo`lmasligi;
bo`yi 175 smdan kam bo`lmasligi;
jismonan baqquvat, ruhan sog`lom, mustaqil fikr yuritadigan bo`lishi;
shaxsiy himoya vositalaridan foydalangan holda zaharli moddalar bilan, shuningdek, sog`lig`iga ko`ra balandlikda ishlashga yaroqli bo`lishi;
muddatli harbiy xizmatni o`tagan bo`lishi kerak.
Shuningdek, qutqaruvchi-haydovchi va g`avvos-qutqaruvchi lavozimiga qo`shimcha quyidagi talablar qo`yiladi:
a) Qutqaruvchi-haydovchi lavozimiga:
kamida “VS” toifali haydovchilik guvohnomasi bo`lishi kerak;
haydovchining tibbiy ko`rikdan o`tganligi bo`yicha maxsus ma`lumotnomasi bo`lishi kerak;
yo`l harakati xavfsizligi qoidalari va shartli belgilarni mukammal bilishi zarur.
b) G`avvos-qutqaruvchi lavozimiga:
O`zbekiston Respublikasi Sog`liqni saqlash vazirligi Sanitariya-gigiena va kasb kasalliklari ilmiy-tadqiqot instituti tomonidan suv ostida ishlashga ruxsat berilgan bo`lishi kerak.
Har yili Favqulodda vaziyatlar vazirligi, Mudofaa vazirligi, Oliy va o`rta maxsus ta`lim vazirliklari bilan birgalikda O`zbekiston Respublikasi Vazirlar Mahkamasiga harbiy kafedrada tayyorgarlikdan o`tkaziladigan talabalar o`rni (kvotasi) bo`yicha taklif kiritiladi.
Harbiy kafedra bitiruvchilari Favqulodda vaziyatlar vazirligi tizimidagi haqiqiy harbiy xizmatga birinchi navbatda qabul qilinadi.
Qutqaruvchi lavozimlariga nomzodlarni tanlab olish shartlari
Nomzodlar soni har bir o`ringa 4 tadan kam bo`lmaganda, ular boshqarma (tuzilma) tomonidan tuzilgan maxsus ishga qabul qilish komissiyasi ishtirokida quyidagi tartibda tanlab olinadi:
a`naviy va siyosiy dunyoqarashi bo`yicha suhbat;
psixologik test;
kasbiy bilimlarini sinovdan o`tkazish (diktant, yozma ish);
jismoniy tayyorgarlik (sport bo`yicha toifa darajasi mavjudligi inobatga olinadi).
Nizomning to`liq matni O`zAda e`lon qilindi.
