...Bekorchilikdan zerikkan ikki yigit poytaxtimizning Ukkosha ko`chasida maqsadsiz kezib yurardi. Yo`l chetiga to`xtagan "Neksiya" ularning e`tiborini tortdi. Undan shoshib tushgan amakining mashina eshigini qulflamay do`konga kirib ketganini ko`rgach, ular o`ylab o`tirmay shu tomonga oshiqdi. Ular eshikni ochishi hamono mashina salonida turgan noutbuk va naqd pullarni qo`lga kiritib, juftakni rostlashdi, deya yozadi UzA.
Shu atrofda kuzatuv kameralari borligi ularning xayoliga ham kelmagandi. Hech qancha vaqt o`tmay, ular yashaydigan xonadonning eshiklarini ichki ishlar organi xodimi taqillatdi. Qilmish – qidirmish, deganlaridek, bu o`g`rilik ishi yuzasidan jinoyat ishi qo`zg`atildi.
Sudda jinoyat sodir etgan shaxslarning oilaviy ahvoli, mahalla va o`quv muassasasi kafilligi inobatga olinib, ularga jarima jazosi belgilandi. Birining voyaga etmagani inobatga olinib, unga jamoat tarbiyachisi tayinlandi.
– Har bir jinoyat ishiga nuqta qo`yilgach, bunga sabab bo`lgan omillarni aniqlash va ularni bartaraf etishga e`tibor qaratiladi, – deydi Jinoyat ishlari bo`yicha Uchtepa tumani sudi raisi Shamsiddin Tojiev. – Shu maqsadda davlat va jamoat tashkilotlari, huquqni muhofaza qiluvchi organlar hamkorligi yo`lga qo`yilgan.
Alohida e`tibor muqaddam sudlangan, spirtli ichimliklarni iste`mol qiluvchi shaxslar va farzand tarbiyasiga etarli e`tibor berilmayotgan notinch oilalarga qaratilmoqda. Tuman hokimi, prokurori, ichki ishlar va soliq idoralari rahbarlariga bo`lingan sektorlar bo`yicha tarkibiga fidoyi insonlar, sud-huquq idoralari xodimlari kiritilgan profilaktika guruhlari tuzildi. Ular mahalla raislari va profilaktika inspektorlari bilan birga xonadonlarga kirib, huquqbuzarlikka moyil shaxslar, tarbiyasi og`ir o`smirlar bilan suhbat o`tkazish bilan cheklanib qolmasdan, ishsiz odamlarni ishga, yoshlarni ta`lim muassasasiga joylashtirish, moddiy yordam ko`rsatish, sog`lomlashtirish va boshqa masalalarni aniqlab, tuman ishchi guruhi mas`ullari ko`magida hal qilishga erishmoqda.
Amalga oshirilgan ishlar natijasida tumanda jinoyatlar soni kamaymoqda. Joriy yilda Hayratiy, Jarbuloq, Shaftolizor, Hojiobod va Zulfizar mahallalarida umuman jinoyat sodir etilmagan.
