AQSh prezidenti Donald Tramp Eronning yadroviy dasturini 20 yilga to'xtatish taklifi yetarli bo'lishi mumkinligini aytib, avvalgi qat'iy talablardan biroz chekingan pozitsiyani bildirmoqda. Trampning ta'kidlashicha, 20 yillik to'xtatish “haqiqiy kafolatlar” bilan mustahkamlanishi kerak. U avval Erondan uran boyitishni doimiy ravishda to'liq to'xtatishni talab qilgan edi.
Biroq prezident muzokaralar jarayonida hali aniq natija yo'qligini, Tehron bilan kelishuvga erishish bo'yicha sezilarli siljish kuzatilmayotganini bildirdi. Shu bilan birga, u Eronga nisbatan sabri tobora tugayotganini ham alohida ta'kidladi.
Ma'lumotlarga ko'ra, muzokaralar doirasida turli takliflar ko'rib chiqilmoqda. Ular qatorida uran boyitishni uzoq muddatga to'xtatish, shuningdek ayrim sanktsiyalar va iqtisodiy cheklovlar masalalari ham muhokama qilingan.
Ayni paytda Tehron va Vashington o'rtasidagi kelishmovchiliklar saqlanib qolmoqda va tomonlar bir-birining asosiy takliflarini qabul qilmagani aytilmoqda.
