"1943 yil dekabr oyi. Qishning qahraton kunlari. 18 yoshimda armiyaga chaqirishdi.
Urush yillari odamlar qiyinchilik bilan ro`zg`or tebratayotgan paytlar. Xaltaga bir siqim mayiz, tutqoq va non olib, yo`lga otlandik. Ikki oy urushga tayyorgarlik ko`rgach, qo`limizga ikkita granata, bitta pilik miltiq berib, Belorussiyaga yuborishdi. Urushga Belorussiya ostonasida qo`shildik. Kuniga bir mahal kechga tomon to`rtta soldat ikki flyagada ovqat va qopda non ko`tarib keladi. Nemislarni Belorussiyadan Polshaga quvib chiqardik. Polshada o`q tegib, jarohatlandim. Ikki oy Ivanov nomli gospitalda davolandim. Gospitaldan 200 kishi besh kunlik egulik, avtomat, o`q-dori olib, yana urushga jo`nadik.
1945 yil 9 may. Elba daryosidan bir kilometr o`ng tomonda Gitlerning qarorgohi, chapda bir qavatli binoning markaziga 50-60 metr balandlikka g`alaba bayrog`i o`rnatib, ortga qaytdik. Tinchlik naqadar ulug` baxt ekanligini odamlarning yuz-ko`zidagi quvonchdan anglab etdim. Urush qiyinchiliklari bo`lsa-da, har bir stansiyada keksayu yosh, ayollar qo`llarida non, shirinliklar bilan bizlarni kutib olardi".
Ishtixon tumani Sheyxlarkenti mahallasida istiqomat qiluvchi Berdirasul bobo Aminov urushning achchiq xotiralarini aytarkan, beixtiyor ko`zlarida yosh qalqidi. Qariyb bir asrlik umri davomida yurt tinchligi, Vatan ravnaqi uchun o`z hissasini qo`shishga intilib yashagan boboning so`zlarida olam-olam hikmat mujassam. 3 o`g`il, 3 qiz, 24 nevara, 40 evarani yurtga sodiq qilib voyaga etkazgan, ularga o`z hayot tajribasini o`rgatgan bobo bugun ularning ardog`ida keksalik gashtini surmoqda.
– Mustaqilligimizga ko`z tegmasin, – deydi Berdirasul bobo Aminov. – Biz urushni ham, undan keyingi qiyinchilikni, ochlikni ham ko`rdik. Yurtimizda bo`layotgan o`zgarishlar, yaratilayotgan imkoniyatlar, erishilayotgan yutuqlarning barchasi shunga munosib bo`lib yashash kerakligini anglatadi. Ba`zan kuniga bir bo`lak qotgan non eb, kun kechirganimizni o`ylasam, bugungi to`y-ma`rakalardagi isrofgarchiliklarni ko`rib, qalbim larzaga keladi.
Prezidentimizning 2018 yil 16 apreldagi "Xotira va qadrlash kuniga tayyorgarlik ko`rish va uni o`tkazish chora-tadbirlari to`g`risida"gi Qarorida Ikkinchi jahon urushi qatnashchilarining istaklari asosida Yalta va Kislovodsk shaharlaridagi hamda respublika hududlaridagi boshqa sanatoriylarga bir nafar kuzatuvchisi bilan birga bepul yuborishni tashkil etib, ularni zarur avia va temiryo`l chiptalari bilan ta`minlash belgilandi. Berdirasul bobo ham bu imkoniyatdan foydalanib, o`g`li bilan bu yil Sochida dam olishni maqsad qilibdi. Quvonchini ichiga sig`dira olmayotgan otaxon yurtimiz tinchligi bardavom bo`lishini, xalqimiz farovonligini yomon ko`zlardan asrashini tilab, duoga qo`l ochadi. Yurtboshimizning yuksak e`tibori, ehtiromi Berdirasul boboga kuch-quvvat bergan go`yo. Yuzidan nur yog`ilib turgan boboga sog`liq tilab, "Yuz bilan yuzlashing, bugunimizning, tinchligimizning sababchisisiz", deya xayrlashdik.
Nasiba JONTO`RAEVA.
"Zarafshon" gazetasi
