Samarqandda xotinini o`ldirib, do`koniga ko`mgan shaxsga hukm o`qildi (video)

Samarqand viloyatida mudhish qotillik oshkor etildi. Fuqaro N.Rahimov rashk tufayli xotinini o`ldirib, o`ziga tegishli do`konga ko`mib qo`yadi.

Er-xotin o`rtasida to`ydan qaytayotganda Tayloq tumani Gulobod mahallasida joylashgan aholiga xizmat ko`rsatish uchun mo`ljallangan oshxonada janjal yuzaga keladi.

N.Rahimov mast holatda turmush o`rtog`i M. Rahimova bilan o`zaro janjallashib, uning yuz qismiga qo`li bilan urib yuboradi. Musht zarbidan erga yiqilgan jabrlanuvchining qorin, bel sohalariga va tanasining boshqa qismlariga tepib, bo`g`ib jarohat etkazgan. N. Rahimov ertasi kuni turmush o`rtog`ining vafot etganini biladi va jasadni yashirishga urinadi.

Tunda xotinining jasadini hali qurib bitkazilmagan do`kon uchun tayyorlangan xonaning burchagida 70 smli chuqur qazib, ko`madi.

U bir yil davomida farzandlari va mahalla ahliga turmush o`rtog`ini Rossiyaga ketib qoldi deb aytadi.

2017 yilning 22 avgustida yuz bergan ushbu holat 2018 yilning 13 fevraligacha sirligicha qoladi.

Jinoyat ishlari bo`yicha Tayloq tuman sudida bo`lib o`tgan sud jarayonida sodir bo`lgan holatlar atroflicha o`rganilib, sudlanuvchi N. Rahimovga 8 yil ozodlikdan mahrum qilish jazosi tayinlanadi.