Ayrim shaxslar tomonidan respublikamizdan naqd xorijiy valyutalarni noqonuniy ravishda olib chiqishga bo`lgan urinishlar hamon ko`zga tashlanmoqda.
Chunonchi, Toshkent viloyati bojxona boshqarmasi “G`ishtko`prik” chegara bojxona posti xodimlari tomonidan ushbu postga “VAN Hool” rusumli avtobusni boshqarib kelgan qo`shni davlat fuqarosi K.K. boshqaruvidagi avtobus bojxona ko`rigidan o`tkazildi. Bu haqda Davlat bojxona qo`mitasi axborot xizmati xabar bermoqda
Natijada, haydovchi o`rindig`i yonidagi kolonka ichida yo`lovchi bojxona deklarasiyasida yozib ko`rsatilmagan va og`zaki so`rovda taqdim qilinmagan, 1 000 000 qozoq tengesi xorijiy valyutasi yashirilgani fosh bo`ldi.
Yana bir holatda mazkur postga piyoda holda kirib kelgan qo`shni davlat fuqarosi A.F. bojxonachilar e`tiborini tortdi va ushbu shaxs belgilangan tartibda bojxona nazoratidan o`tkazildi.
Natijada, ushbu shaxs egnidagi kiyimlari orasiga 502 AQSh dollari va sumkasiga 6004 AQSh dollarini bojxona nazoratidan yashirib olib o`tishga uringanligi aniqlandi.
Hozirda yuqoridagi holatlar yuzasidan bojxona organlari tomonidan surishtiruv harakatlari davom ettirilmoqda.
