Samarqand viloyati Pastdarg`om tumanida yashovchi T.Xurramov o`z xonadonidan ov qurolini topib oldi. Bu haqda Milliy gvardiya matbuot xizmati xabar berdi.
Ma`lum qilinishicha, fuqaro uyini ta`mirlash vaqtida uy tomidan marhum bobosidan qolgan TOZ rusumli,16 kalibrli, bir stvolli ov qurolini topib olgan. Ta`kidlanishicha, qurol 1964 yilda ishlab chiqarilgan.
"T.Xurramov zudlik bilan O`zbekiston Respublikasi Milliy gvardiyasining Samarqand bo`linmasiga xabar bergan va o`z xohishi bilan o`rnatilgan tartibda topshirgan", - deyiladi xabarda.
Bundan tashqari, Toshkent viloyatida ham fuqarolar tomonidan topilgan qurollar Ichki ishlar vazirligining tegishli bo`linmalariga belgilangan tartibda topshirilganligi ma`lum qilingan.