Bojxonachilar tomonidan telefon va telefon aksessuarlarining respublikamizga noqonuniy olib kirilishining bir nechta holati aniqlandi.
Toshkent viloyati bojxona boshqarmasi “Yallama” chegara bojxona posti xodimlari tomonidan Rossiya Federasiyasidan respublikamizga o`tish uchun ushbu postga kirib kelgan fuqaro Q.X. boshqaruvida bo`lgan “Lada-Largus” rusumli avtoulov bojxona ko`rigidan o`tkazildi. Bu haqda Davlat bojxona qo`mitasi axborot xizmati xabar bermoqda
Natijada, avtomashina yukxonasida og`zaki savol javobda aytilmagan va yo`lovchi bojxona deklarasiyasida ko`rsatilmagan, xorijda ishlab chiqarilgan umumiy qiymati 67,6 million so`mlik 12 940 dona uyali telefon aksessuarlarini bojxona to`lovlaridan qochish maqsadida yashirib olib kirish vaqtida to`xtatib qolindi.
Shuningdek, “G`ishko`prik” chegara bojxona posti Kontrabanda va bojxona qonunchiligi buzilishiga qarshi kurashish guruhi xodimi tomonidan, fuqaro E.A.ning qo`l yuklari xolislar ishtirokida tekshirilganida, qo`l sumkasi ichida qiymati 14 million so`mlik 18 dona turli rusumdagi uyali telefonlari borligi aniqlandi.
“Farxod” chegara bojxona posti xodimi tomonidan ham yana bir holatda qo`shni davlatdan piyoda holda kirib kelgan fuqaro S.M. og`zaki savol-javobdan so`ng, xolislar ishtirokida shaxsiy ko`rikdan o`tkazilganida, kiyimlari orasiga yashirilgan qiymati 1,6 million so`mlik jami 8 dona, uyali aloqa vositalari borligi ma`lum bo`ldi.
Hozirda ushbu holat yuzasidan bojxona organlari tomonidan surishtiruv harakatlari davom ettirilmoqda.
