Oktyabr oyida Qarshi tumanidagi 7-maktab o`quvchisi 15 yoshli R.A. Qarshi bosh kanaliga tashlab o`z joniga qasd qildi. Ko`pgina muhokamalarga sabab bo`lgan voqeani “Darakchi”ning jamoatchi muxbiri Otabek Qo`ldoshev tafsilotlarni o`rgandi...
R.Ani o`limidan oldin izza qilishgan
Maktabning 6- “G” sinfida tahsil oluvchi Rustam Asqarovning aytishicha, voqea sodir bo`lgan kuni marhum R.A.ni sinf rahbari Sabo Rashidova elkasidan tutib, sinfdoshlari turgan zal tomon sudrab borgan. O`quvchi buni o`z ko`zi bilan ko`rganini ta`kidlamoqda.
Rustam Asqarov, maktab o`quvchisi, guvoh:
— Domlasi yoqasidan ushlab majlislar zalga sudrab ketayotgandi, u esa yig`lab, ustozining qo`lini siltab tashlaganini ko`rgandim. Chap yuzlari qizargandi. Menimcha, ustozi urgan bo`lsa kerak. Ammo urganini ko`rmadim.
Rad etuvchilar ham bor
Marhum o`quvchining sinfdoshi Bekjon Sayfullaev esa R.A.ning haqorat qilinganiyu, sinf rahbari tomonidan sinfdoshlari tomon sudrab olib kelinganini rad etmoqda.
Bekjon Sayfullaev, marhumning sinfdoshi:
— O`sha kuni texnologiya faniga kirganimizda, 3-4 nafar sinfdoshlarimiz telefon tomosha qilishayotgandi. Borib qarasak, uyatsiz videolar ekan. Keyin bilsak uyatsiz videolar bor telefon R.A.ning telefoni ekan.
14 nafar o`g`il boladan 6 dona telefon
O`quvchilarning ma`lumot berishicha, holat o`qituvchilarga ma`lum qilingach, direktor o`rinbosari Mehriniso Ravshanova hamda Sabo Rashidovalar 14 nafar o`g`il bolalar bilan suhbat olib boradi.
— Maktab hovlisida yurgan paytim 9-sinf qizlari kelib, “Domla, sinfimiz o`g`il bolalari telefondan yomon narsalar ko`rishyapti”, - dedi. – Xo`p, sizlar darsga boraveriylar, o`zim gaplashaman deb, ma`naviyatxonaga keldim. Kelsam, har ikkala ma`naviyatchi ham (direktorning ma`naviy-ma`rifiy ishlar bo`yicha o`rinbosarlari nazarda tutilmoqda. Tah. ) yozuv yozayotgan ekan. Voqeani aytdim. Ular bayonnoma yozishayotganini aytishdi. So`ngra, o`sha — 9 “V” sinf rahbari Sabo Rashidovani olib, video ko`rayotgan o`g`il bolalar yoniga bordik.
Aytilishicha, Mehriniso Ravshanova hamda Sabo Rashidovalar 9 “V” sinf o`g`il bolalari yoniga borib, kimda telefon bo`lsa barchasini yig`ib olgan. 14 nafar o`g`il boladan 6 dona telefon chiqqan.
Telefonlarni yig`ib olib, nazoratdan o`tkazgan o`qituvchilarning ma`lum qilishicha, telefonlarning hech biridan pornografik mazmundagi videolar chiqmagan.
Sabo Rashidova, direktor o`rinbosari:
— Telefonlarni yig`ib olganimizdan so`ng, kimning telefonida uyatsiz videolar borligini so`radik. Shunda hech kim javob bermadi. Jim turishdi. Keyin o`quvchilarni qo`rqitib, ma`lumotni bilib olish maqsadida Ruslan degan o`quvchiga qarab, “Ruslanning dadasiga telefon qilay-chi” dedim. Shunda telefonni qo`lga olganimni ko`rgan Ruslan “Video sinfdoshimiz R.A.ning telefonida bor”, - dedi. Shunda R.A. dan “shu rostmi deb”, - so`radim, U yo`q deya yig`lay boshladi. Shunda telefonining “kod”ini ochib berishini so`radim va telefonning ichini ko`rdim. Ammo unday video yo`q ekan.
O`qituvchining taxminicha, video unga kelgunga qadar o`chirilgan.
Ma`lum qilinishicha, o`g`il bolalar qilmishi sinfxonadagi muhokamadan so`ng, maktabning faollar zalida ham davom etgan. Zalda 14 nafar o`quvchi maktabga telefon olib kelmasligini aytib, tushuntirish xati yozgan.
Ikki marta tarsaki elkasidan tortib, sudralish
Voqea guvohlari — Rustam Asqarov hamda ismini ochiqlamaslimizni so`ragan maktab o`qituvchisining aytishicha, marhum R.A. sinfxonadan faollar zaliga kelgunga qadar sinf rahbari tomonidan haqoratlangan, yuziga ikki marta tarsaki tushirilgan. Elkasidan tortib, sudralgan.
R.A. sinfdoshlariga o`zini kanalga tashlamoqchiligini aytgan.
Sabo Rashidova:
— Bekjon ismli o`quvchi yonimga kelib, R.A. o`zini kanalga suvga tashlamoqchiligini aytdi. Shunda yuragim shuv etdi. Shu zahoti o`quvchimning onasi Xurshid Xolmatovaga qo`ng`iroq qilib, voqeani aytdim va tez etib kelishini so`radim.
“Akamni o`qituvchisi sudrab, uyaltirdi”
Marhum R.A.ning onasi Xurshida Xolmatovaning aytishicha, haqiqatdan ham o`sha kuni o`qituvchisi qo`ng`iroq qilib, tez etib kelishini, kelmaguncha o`g`lining telefonini qaytarib bermasligini aytgan.
Xurshida Xolmatova, R.A.ning onasi:
— Maktabga etib bordim, borsam sinf rahbari o`g`limni o`quvchilarning yonida uyaltirgan. O`g`lim yig`lagan “telefonimning bering, bermasangiz o`zimni o`ldiraman” degan. Ammo o`qituvchisi unga quloq solmagan va elkasidan sudrab, tilxat yozib berishini so`ragan. Buni hatto 6-sinfda o`qiydigan qizim ham ko`rgan. Qizim o`qishdan kelib, “bugun akamni o`qituvchisi sudrab, sinfdoshlarining oldida uyaltirdi, sapbabini akamdan so`rang”, dedi. Ammo afsuski, u payt o`g`lim o`lgan, qizim esa bundan endi xabar topgandi (yig`lab yubordi).
Sabo Rashidova, Mehriniso Ravshanova hamda R.A.ning sinfdoshlariga ko`ra, uning onasi maktabga kelgach, R.A. maktab hovlisidan qochib chiqib ketgan.
— O`g`lim chopib chiqib ketgach, velosipedining oldiga borayotgan bo`lsa kerak deb o`yladim, - deydi marhumning onasi. – Men ham qaytaman deganimda, sinf rahbari tilxat yozib berasiz deb turib oldi. O`sha erda 3 daqiqa tortishdik.
Marhum R.A. maktab hovlisidan chiqib, to`g`ri kanalga ketgan. Buni bilgan 3 nafar sinfdoshi ham unga ergashgan.
Zohid Pardaev, marhumning sinfdoshi:
— Maktab hovlisidan R.A. bilan birga yugurib chiqdik. Shunda unga “velosipedingda meni ham olib ket” dedim. U esa “buyoqqa ketayapman” deb kanal tomonni ko`rsatdi. Shunda o`qituvchimiz Sabo opaga R.A. kanalga ketganini telefon qilib aytdim. O`qituvchimiz esa ortidan borishimizni tayinladi. Men ham 2 nafar sinfdoshim bilan uning ortidan ketdik.
O`quvchilarning aytishicha, kanal bo`yiga borgan R.A. sinfdoshlarini uzoqdan ko`rgach, o`zini suvga otgan va bir sho`ng`ib chiqqan. Ular yaqinlashgach esa yana suvga sho`ng`igan va suvdan qaytib chiqmagan.
Marhumning jasadi 2 soatdan so`ng topildi
7-maktab direktori Nodir Eshonqulovning ma`lumot berishicha, o`quvchining kanalga ketganidan xabar topishgach, o`rinbosarlari bilan birga kanal bo`yiga borgan va o`quvchisini izlagan. Hudud profilaktika inspektoriga xabar bergan. Borishsa, marhumning onasi kanal bo`yida yig`lab o`tirgan. Marhumning jasadi MChS xodimlari tomonidan 2 soatda suvga sho`ng`igan joyidan 40-50 metr naridan topilgan.
Ma`lumot o`rnida:
Xalqimizda “Uyat o`limdan ham qattiq” degan gap, bejizga aytilmagan. O`smir yigitning birgina qilmishi ortida katta fodea sodir bo`lishini kim ham bilibdi deyisiz. Oqibatini o`ylamay bosilgan qadamlar oilaning paxlavon o`g`li hayotdan ko`z yumushiga sabab bo`ldi. Onaning azob-uqubatini hatto tasavvur ham qilib bo`lmaydi, afsus. Biror gap bilan tasalli berish, ovutishning ham endi foydasi yo`q. Faqat har kim o`ziga xulosa chiqaradi, holos...
P/S: Hozirda mazkur holat yuzasidan Qarshi tumani prokuraturasi tomonidan tergovga qadar tekshiruv harakatlari olib borilmoqda.
