9 noyabrda Rimda bo`lib o`tgan yig`ilishda 70 dan ko`proq davlat yomon sovitish oqibatida ayniydigan oziq-ovqat mahsulotlari miqdorini kamaytirish uchun jiddiy sa`y-harakatlarni amalga oshirishga kelishib olishdi. Bu haqda Associated Press agentligiga tayanib fao.org/news xabar berdi.
Bu boradagi hujjat Rimda o`tgan Monreal bayonnomasi yig`ilishida imzolandi.
Tadqiqotlardan ayon bo`ldiki dunyoda ishlab chiqariladigan oziq-ovqat mahsulotlarining uchdan bir qismi ayniydi va buning natijasida atrof-muhitga jiddiy ziyon etadi. Shu munosabat bilan oziq-ovqatlarni sovuq holda saqlash va tashishning mukammalroq usullari ishlab chiqilishiga ehtiyoj bor. Bu ekologiyaga salbiy ta`sir ko`rsatayotgan chiqindilar miqdori kamayishiga imkon berishadi, deyishmoqda mutaxassislar.
Rivojlangan davlatlarda sovitish tizimining yaxshi ishlamasligi tez ayniydigan mahsulotlarning 9 foizining, rivojlanayotgan davlatlarda esa deyarli 23 foizining aynib ketishiga olib kelmoqda.
Mutaxassislarning aytishicha, sovitish tizimining yaxshilanishi issiqxona gazlari hamda sovitish va shamollatish tizimlarida qo`llanuvchi zararli gazlar miqdorini qisqartirishga ham yordam beradi.
AQSh, Xitoy, Evropa Ittifoqi a`zolari hamda Amerika, Afrika va Osiyoning ko`plab davlatlari ushbu majburiyatni bajarishga rozi bo`lishgan.
