Nishonda bir maktab ikkiga bo`lingan. Ayrim sinflarga "omborxona"da dars o`tiladi

Qashqadaryo viloyati Nishon tumanidagi 2-umumiy o`rta ta`lim maktabining 1958-yilda qurilgan binosida 4,8,11-sinf o`quvchilariga dars o`tilmoqda. Ushbu holat “Nasafnews” muxbiri tomonidan o`rganildi.

Ma`lum bo`lishicha, maktab rahbariyati asosiy binoda o`quvchi soni ortib ketganligi tufayli eski maktab binosidan foydalanishga majbur bo`lishmoqda.

-Yangi o`quv binosi 2007 yilda davlat dasturi asosida qurilgan bo`lib, 315 o`ringa mo`ljallangan,- deydi maktab direktori Sanjar Xoliqov. Hozirda maktabimizda tahsil olayotgan o`quvchilar soni 705 nafarni tashkil etganligi sababli yangi binoga o`quvchilar sig`mayapti.

Eski maktab binosi 205 o`ringa mo`ljallangan bo`lib, bugungi kunda ayrim xonalari yaroqsiz holga kelib qolgan va ta`lim-tarbiya jarayonini olib borish uchun talabga javob bermaydi.
Shuning uchun, bu xonalardan omborxona sifatida ham foydalanishmoqda.
Nafaqat eski sinfxonalardan balki maktab ichidagi zallarda ham Nishon tuman xalq ta`limi bo`limiga berilgan yangi parta-stullar qalashtirib tashlangan. Bundan ko`rinidaki, bu joyda ham o`quvchilarga dars beriladi, yana parta-stullarni saqlash uchun ham foydalaniladi.

-Parta-stullar ta`til vaqtida olib kelingan edi,- deydi Sanjar Xoliqov.
Ayni paytda boshqa maktablar kelib bu jihozlarni olib ketishyapti. Dars jarayoni boshlanguncha hech qanday jihozlar eski binomizda qolmaydi. Buni Xalq ta`limi bo`limining o`zi nazorat qilib boryapti.

Sanjar Xoliqovga ko`ra, eski maktabdan foydalanishayotgani haqida hamma joyga bildirgi berilgan. Tuman hokimligiyu, xalq ta`limi bo`limi ham vaziyatdan xabardor. Bundan bir yil avval viloyat xalq ta`limi boshqarmasiga xat chiqarilgan.

-Bu bino davlat dasturiga kiritildi deb aytilyapti. Lekin bu bo`yicha hech qanday hujjatni hali ko`rmadik, deb qo`shimcha qiladi u.

Eski maktab binosidagi holatga e`tiboringizni qaratsak:
Birinchidan maktab har jihatdan eskirgan, kirish eshiklari ta`mirtalab holga kelib qolgan. Binodagi mavjud sinfxonalarning derazalari yoriq hosil qilib, ayrimlari singan.
Maktab ichkarisidagi xonalarning birida «qurol saqlash xonasi» mavjud bo`lib, mas`ullarning izohiga ko`ra, bu xonada qurollarning maketlari saqlanadi. Unda nega qurol saqlash xonasi deb yozib qo`yilgani bizda yana savol tug`dirdi.

Nishon tuman xalq ta`limi bo`limi mudiri vazifasini bajaruvchi Norsafar Yoqubovning fikriga ko`ra, 2-maktabning bu binosi talabga javob berar ekan?

-Maktabning eski binosi juda ham avariya holatida emas. Bo`sh turganligi uchun hozirda 2 ta sinfxonadan foydalanyapmiz. Maktab eskirib qolmagan. Dars o`tish uchun talabga javob beradi.

Shundan so`ng, dars o`tilayotgan sinfxonalarga ham nazar tashladik. Sinfxonalardagi parta-stullar eskirib qolmagan. Jihozlar bilan to`liq ta`minlangan. Lekin asosiy muammo binoning eski ekanligida. Buni inkor etish esa mantiqqa ziddir.
Xo`sh, masalani mas`ullar qanday izohlaydi?