Нишонда бир мактаб иккига бўлинган. Айрим синфларга "омборхона"да дарс ўтилади (фото)

Қашқадарё вилояти Нишон туманидаги 2-умумий ўрта таълим мактабининг 1958-йилда қурилган биносида 4,8,11-синф ўқувчиларига дарс ўтилмоқда. Ушбу ҳолат “Nasafnews” мухбири томонидан ўрганилди.

Маълум бўлишича, мактаб раҳбарияти асосий бинода ўқувчи сони ортиб кетганлиги туфайли эски мактаб биносидан фойдаланишга мажбур бўлишмоқда.

-Янги ўқув биноси 2007 йилда давлат дастури асосида қурилган бўлиб, 315 ўринга мўлжалланган,- дейди мактаб директори Санжар Холиқов. Ҳозирда мактабимизда таҳсил олаётган ўқувчилар сони 705 нафарни ташкил этганлиги сабабли янги бинога ўқувчилар сиғмаяпти.

Эски мактаб биноси 205 ўринга мўлжалланган бўлиб, бугунги кунда айрим хоналари яроқсиз ҳолга келиб қолган ва таълим-тарбия жараёнини олиб бориш учун талабга жавоб бермайди.
Шунинг учун, бу хоналардан омборхона сифатида ҳам фойдаланишмоқда.
Нафақат эски синфхоналардан балки мактаб ичидаги залларда ҳам Нишон туман халқ таълими бўлимига берилган янги парта-стуллар қалаштириб ташланган. Бундан кўринидаки, бу жойда ҳам ўқувчиларга дарс берилади, яна парта-стулларни сақлаш учун ҳам фойдаланилади.

-Парта-стуллар таътил вақтида олиб келинган эди,- дейди Санжар Холиқов.
Айни пайтда бошқа мактаблар келиб бу жиҳозларни олиб кетишяпти. Дарс жараёни бошлангунча ҳеч қандай жиҳозлар эски биномизда қолмайди. Буни Халқ таълими бўлимининг ўзи назорат қилиб боряпти.

Санжар Холиқовга кўра, эски мактабдан фойдаланишаётгани ҳақида ҳамма жойга билдирги берилган. Туман ҳокимлигию, халқ таълими бўлими ҳам вазиятдан хабардор. Бундан бир йил аввал вилоят халқ таълими бошқармасига хат чиқарилган.

-Бу бино давлат дастурига киритилди деб айтиляпти. Лекин бу бўйича ҳеч қандай ҳужжатни ҳали кўрмадик, деб қўшимча қилади у.

Эски мактаб биносидаги ҳолатга эътиборингизни қаратсак:
Биринчидан мактаб ҳар жиҳатдан эскирган, кириш эшиклари таъмирталаб ҳолга келиб қолган. Бинодаги мавжуд синфхоналарнинг деразалари ёриқ ҳосил қилиб, айримлари синган.
Мактаб ичкарисидаги хоналарнинг бирида «қурол сақлаш хонаси» мавжуд бўлиб, масъулларнинг изоҳига кўра, бу хонада қуролларнинг макетлари сақланади. Унда нега қурол сақлаш хонаси деб ёзиб қўйилгани бизда яна савол туғдирди.

Нишон туман халқ таълими бўлими мудири вазифасини бажарувчи Норсафар Ёқубовнинг фикрига кўра, 2-мактабнинг бу биноси талабга жавоб берар экан?

-Мактабнинг эски биноси жуда ҳам авария ҳолатида эмас. Бўш турганлиги учун ҳозирда 2 та синфхонадан фойдаланяпмиз. Мактаб эскириб қолмаган. Дарс ўтиш учун талабга жавоб беради.

Шундан сўнг, дарс ўтилаётган синфхоналарга ҳам назар ташладик. Синфхоналардаги парта-стуллар эскириб қолмаган. Жиҳозлар билан тўлиқ таъминланган. Лекин асосий муаммо бинонинг эски эканлигида. Буни инкор этиш эса мантиққа зиддир.
Хўш, масалани масъуллар қандай изоҳлайди?