“The New York Times”da Toshkent metropoliteni tasvirlandi

“The New York Times” nashrida Toshkent metropoliteni haqida fotoocherk e`lon qilindi. 

Maqolada Toshkent metropolitenining o`ziga xos me`moriy ishlari, uning ozoda va shinam ekanligi alohida ta`kidlagan. Shuningdek, bir necha yillar mobaynida bu go`zallik tashqi dunyodan berkitib kelingani ham qayd etilgan.

“Bir necha o`n yillab Toshkent metropolitenini suratga tushirish milliy xavfsizlik nuqtai nazaridan mutlaqo ta`qiqlangan edi. Biroq 2016 yilda prezidentlik kursisiga kelgan Shavkat Mirziyoev islohotlari davrida metroni suratga tushirish borasidagi ta`qiq olib tashlandi”, deyiladi.

Muallif bekatlarga ta`rif ham bergan. Jumladan, “Paxtakor” bekati xususida shunday yozadi:

“Paxtakor” bekati devorlarining yuqori qismi paxta qobig`ini aks ettiruvchi mozaika bilan bezatilgan. O`zbekiston turli ziddiyatlarga qaramay dunyoning paxta etishtiruvchi etakchi mamlakatlari sirasiga kiradi. Biroq yaqinda o`zbek hukumati paxta yig`im-terimi paytida shifokorlar, talabalar, o`qituvchilar va boshqa shaxslarning majburiy mehnatiga yo`l qo`ymaslik to`g`risida qaror qabul qildi...”

Shuningdek, maqolada prezident Shavkat Mirziyoev siyosatiga ham munosabati bildirilgan.

“Janob Mirziyoev rahbarligi ostida mamlakatda ochiqlik belgilari namoyon bo`la boshladi. Hukumat mamlakatga keluvchilar uchun to`siqlarni olib tashlay boshlagach, tashrif buyuruvchilar soni 2018 yilda 6,4 million kishigacha etdi. 2017 yilda 2,8 million nafarni tashkil etgandi...”