Yangi yil yaqinlashgani sayin pirotexnika vositalarining savdosi, noqonuniy aylanma yo`llar orqali olib kirilishi, tashilishi chegara hududlarda tez-tez kuzatila boshlaydi.
Kuni kecha Farg`ona viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo`limi xodimlari Davlat xavfsizlik xizmati vakillari bilan hamkorlikda pirotexnika vositalarining noqonuniy aylanmasiga qarshi tezkor tadbir o`tkazishdi. Bu haqda Davlat bojxona qo`mitasi axborot xizmati xabar bermoqda
Tezkor tadbir davomida, fuqaro A.T boshqaruvidagi “Kobalt” rusumli, avtomashina Marg`ilon shahri hududida to`xtatilib, xolislar ishtirokida ko`zdan kechirildi.
Natijada, avtomashina yukxonasi va salonida umumiy qiymati 55,8 million so`mlik 558 000 dona pirotexnika vositalari borligi aniqlandi.
Hamkorlikda o`tkazilgan tezkor tadbir davomida, Farg`ona tumanida yashovchi fuqaro N.Sh.ning xonadoni belgilangan tartibda xolislar ishtirokida ko`zdan kechirildi.
Tekshiruv jarayonida ushbu xonadonda noqonuniy tarzda umumiy qiymati 69,6 million so`mlik 571 254 dona pirotexnika vositalari saqlanayotgani aniqlandi.
O`tkazilgan tezkor tadbirlar davomida 1 129 254 dona pirotexnika vositalarini respublikamiz xududiga yashirincha olib kirishga bo`lgan urinishning oldi olindi
Hozirda mazkur holatlar yuzasidan bojxona organlari tomonidan surishtiruv harakatlari davom ettirilmoqda.
