Sergelidagi Janubiy sanoat hududida joylashgan er maydonini firibgarlik yo`li bilan sotish holati aniqlandi. Bu haqda “darakchi.uz”ga Bosh prokuratura Matbuot xizmati ma`lum qildi.
Bosh prokuratura huzuridagi Departamentning Sergeli tumani bo`limi xodimlari tomonidan o`tkazilgan tezkor tadbirda, Sergeli tumani, Janubiy sanoat hududidan “O.P.” MChJga investisiya jalb qilib, ish o`rinlarini yaratish majburiyatlari yuklangan holda qurilish mahsulotlari ishlab chiqaruvchi korxona tashkil etish uchun nol qiymatda ajratilgan umumiy maydoni 0.70 ga bo`lgan er uchastkasida jamiyat ta`sischisi X.N. va boshqalar hech qanday qurilish ishlarini olib bormasdan, balki firibgarlik yo`li bilan
155 000 AQSh dollariga sotishni rejalashtirib, kelishilgan summadan
10 000 AQSh dollarini fuqaro V.P.dan olgan vaqtida ashyoviy dalillar bilan ushlangan.
Shuningdek, ushbu holat yuzasidan o`tkazilgan tergovga qadar tekshiruvda, “O.P.” MChJ ta`sischisi X.N. va boshqalar tomonidan olingan majburiyat bajarilmasdan er uchastkasidan boshqa maqsadlarda foydalanilganligi oqibatida davlat va jamiyat manfaatlariga jiddiy ziyon etkazilganligi aniqlangan.
Mazkur holat yuzasidan “O.P.” MChJ ta`sischisi X.N. va boshqalarga nisbatan Jinoyat kodeksining tegishli moddalari bilan jinoyat ishi qo`zg`atilib, tergov harakatlari o`tkazilmoqda.
