Kuni kecha ijtimoiy tarmoqlarda 6 yoshligida tergovchi, 15 yoshligida bosh tergovchi bo`lgan, 2012 yildan beri yurist bo`lib ishlab kelayotgan, 2016 yilda esa pediatriya institutini bitirgan fuqaroning nomzodi ko`rsatilgani aks etgan plakatlarning suratlari tarqaldi.
Bu bo`yicha O`zbekiston "Adolat" SDP Toshkent shahar kengashi rasmiy bayonot berdi.
"Adolat" SDP yillar davomida xalqimiz ishonchini qozongan, yuksak bilim va malakaga ega nomzodlarni barcha darajadagi deputatlik o`rinlari uchun ilgari surmoqda. Ammo ba`zi bir texnik sabablarga ko`ra saylovchilarni chalg`ituvchi xatolar ham o`tib ketmoqda.
Jumladan, Toshkent shahar kengashi tomonidan ko`rsatilgan Rasulov Yorqin Erkinovich va Aliev Zaurxan Sagrabovich kabi nomzodlarning targ`ibot plakatlarida yuqoridagi kabi texnik kamchiliklar kuzatildi.
Bugungi kun holati bo`yicha texnik xatolarga ega bo`lgan plakatlar olib tashlandi va ertaning o`zidayoq yangi tahrirdagi plakatlar joylashtirilishi ko`zda tutilgan.
Bunday holatlardagi texnik xatoliklarga o`z vaqtida e`tibor qaratgan bloger va saylovchilarga minnatdorchilik bildirgan holda mazkur holatlardagi xato va kamchiliklar to`laqonli bartaraf etilishini ma`lum kilamiz. O`ylaymizki, bunday texnik xatoliklar saylovchilarimizning "Adolat" SDPga bo`lgan ishonchiga ta`sir qilmaydi, deb yozadi Partiya Toshkent shahar kengashi matbuot xizmati.
Darvoqe hozirda O`zbekiston Ekologik partiyasidan Xalq deputatlari Yunusobod tumani kengash deputatligiga nomzodning plakatida uning tug`ilishidan 6 yil oldin oliy ma`lumot olgani to`g`risidagi ma`lumot aks etgan holat ham mavjud.
