Bo`linmalarning jangovar shayligini yanada oshirish, ularning tayyorgarligini har tomonlama baholash maqsadida Sharqiy harbiy okrugga qarashli harbiy qism va muassasalarida o`quv mashg`ulotlari o`tkazildi.
Harbiy qismlar berilgan buyruqqa asosan qisqa fursatda jangovar shaylikka keldi va o`ziga biriktirilgan harbiy texnikalarga kelib joylashishdi.
Bo`linmalar dala-o`quv maydoniga kalonna tarkibida harakatlandi. Bu jarayonda texnika xavfsizligi qoidalariga qat`iy rioya qilishga e`tibor qaratildi.
Ta`kidlash joizki, so`nggi yillarda o`tkazilayotgan bunday o`quvlarda Qurolli Kuchlar tuzilmalari hamkorligini ta`minlashga harakat qilinmoqda. Maqsad olib boriladigan jangovar o`quv mashg`ulotlarining samaradorligini yanada oshirish. Sharqiy harbiy okrug qo`shinlari qo`mondonligida kechgan yig`ilishda o`quv mashg`ulotini amalga oshirish yuzasidan komandirlarning qabul qilgan qarorlari tinglandi.
Harbiy xizmatchiga qo`yilayotgan bugungi talab, o`z bilim va ko`nikmalarini muntazam oshirib borish, jangovar shaylikni bir zum bo`lsin, qo`ldan boy bermaslik. Ana shu maqsadda dala-o`quv maydoniga kelib joylashgan Vatan posbonlari turli o`quv me`yorlari bo`yicha sinovlardan o`tishdi.
Dala-o`quv maydoning bir nuqtasida harbiy xizmatchilar ommaviy qirg`in qurollaridan himoyalanish kiyimini belgilangan vaqtda kiyish bo`yicha me`yorlarni bajarishayotgan bo`lsa, ikkinchi nuqtada minamyotchilar batareyasi ish olib bormoqda.
Yurt qalqonlari o`quvlar davomida AK-74 avtomatidan birinchi va ikkinchi o`q otish me`yorlarini ham bajarishdi.
Desantchilar jangovar mashinasidan otish va boshqarish mashqlarida ham shaxsiy tarkib o`z salohiyatini namoyish qilishdi.
O`tkazilgan mazkur o`quv mashg`ulotlari qo`shinlar jangovar shayligini yanada takomillashtirishda yana bir qadam bo`ldi.
Mudofaa vazirligi Axborot va ommaviy kommunikasiyalar departamenti
