Бўлинмаларнинг жанговар шайлигини янада ошириш, уларнинг тайёргарлигини ҳар томонлама баҳолаш мақсадида Шарқий ҳарбий округга қарашли ҳарбий қисм ва муассасаларида ўқув машғулотлари ўтказилди.
Ҳарбий қисмлар берилган буйруққа асосан қисқа фурсатда жанговар шайликка келди ва ўзига бириктирилган ҳарбий техникаларга келиб жойлашишди.
Бўлинмалар дала-ўқув майдонига калонна таркибида ҳаракатланди. Бу жараёнда техника хавфсизлиги қоидаларига қатъий риоя қилишга эътибор қаратилди.
Таъкидлаш жоизки, сўнгги йилларда ўтказилаётган бундай ўқувларда Қуролли Кучлар тузилмалари ҳамкорлигини таъминлашга ҳаракат қилинмоқда. Мақсад олиб бориладиган жанговар ўқув машғулотларининг самарадорлигини янада ошириш. Шарқий ҳарбий округ қўшинлари қўмондонлигида кечган йиғилишда ўқув машғулотини амалга ошириш юзасидан командирларнинг қабул қилган қарорлари тингланди.
Ҳарбий хизматчига қўйилаётган бугунги талаб, ўз билим ва кўникмаларини мунтазам ошириб бориш, жанговар шайликни бир зум бўлсин, қўлдан бой бермаслик. Ана шу мақсадда дала-ўқув майдонига келиб жойлашган Ватан посбонлари турли ўқув меъёрлари бўйича синовлардан ўтишди.
Дала-ўқув майдонинг бир нуқтасида ҳарбий хизматчилар оммавий қирғин қуролларидан ҳимояланиш кийимини белгиланган вақтда кийиш бўйича меъёрларни бажаришаётган бўлса, иккинчи нуқтада минамётчилар батареяси иш олиб бормоқда.
Юрт қалқонлари ўқувлар давомида АК-74 автоматидан биринчи ва иккинчи ўқ отиш меъёрларини ҳам бажаришди.
Десантчилар жанговар машинасидан отиш ва бошқариш машқларида ҳам шахсий таркиб ўз салоҳиятини намойиш қилишди.
Ўтказилган мазкур ўқув машғулотлари қўшинлар жанговар шайлигини янада такомиллаштиришда яна бир қадам бўлди.
Мудофаа вазирлиги Ахборот ва оммавий коммуникациялар департаменти
