Bojxona organlari tomonidan pirotexnika vositalarining noqonuniy aylanmasiga qarshi qattiq kurash olib borilmoqda. Shu paytgacha pirotexnika vositalarini pullab boyimoqchi bo`lgan, ularni yashirin yo`llar orqali respublikamiz hududiga olib kirishga uringan kimsalarning qanchasi qo`lga tushdi, qanchasi noqonuniy savdoga tikkan mablag`idan ajraldi. Ammo fuqarolar salomatligini xavf ostiga qo`yib, mo`may daromad orttirishni niyat qilgan "tadbirkorlar"ni to`xtatib bo`lmayapti.
Xususan, Andijon viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo`limi xodimlari tomonidan huquqni muhofaza qiluvchi boshqa organlar bilan hamkorlikda Andijon shahrida o`tkazilgan tezkor tadbir davomida yana bitta shunday huquqbuzarlik holati aniqlandi.
Tezkor tadbir davomida fuqaro U.J boshqaruvida bo`lgan “Matiz” rusumli avtotransport vositasi to`tatilib ko`zdan kechirilganida, avtomashina salonida fuqaro I.Fga tegishli hech qanday xujjatlari bo`lmagan 27 000 dona “Korsar 1 K0201” yozuvli pirotexnika vositalarini yashirincha sotish maqsadida olib kirayotganida xolislar ishtirokida qo`lga olindi. Bu haqda Andijon viloyati bojxona boshqarmasi xodimi F.Karimov Darakchi.uz ga xabar berdi.
Hozirda mazkur holat yuzasidan bojxona organlari tomonidan surishtiruv ishlari davom ettirilmoqda.
