Bosh prokuror bir kun samarqandliklar dardu tashvishlari bilan yashadi (foto)

Bugungi kunda prokuratura organlari tomonidan o`tkazilayotgan qabullarda fuqarolarning bir necha yillardan buyon o`zining echimini topmayotgan muammo va takliflarini joyida hal etishga alohida e`tibor qaratilmoqda.

Xususan, kecha, 19 dekabr kuni Bosh prokuror Nig`matilla Yo`ldoshev tomonidan Samarqand viloyatida sayyor qabul o`tkazilib, unda jami 44 nafar jismoniy va yuridik shaxslar vakillari qabul qilinib, ularning murojaatlari olindi.

Bosh prokuratura Matbuot xizmatining ma`lum qilishicha, qayd etilgan murojaatlarning 11 tasi sud masalalari, 8 tasi prokuratura, 6 tasi ichki ishlar ish yurituviga hamda 19 tasi ijtimoiy-iqtisodiy masalalarga oid murojaatlarni tashkil etdi.

Murojaatlarning 12 tasi joyida qanoatlantirildi.

Shuningdek, Nig`matilla Yo`ldoshev Samarqand shahriga tashrif buyurib, shahardagi ijtimoiy-iqtisodiy sohada amalga oshirilayotgan ishlar ahvoli, aholining turmush tarzi bilan tanishib  chiqdi.

Jumladan, shaharning “Nurafshon” mahalla fuqarolar yig`inida istiqomat qiluvchi kam ta`minlangan oila sifatida ro`yxatga olingan fuqaro R.Mamaev va ikkinchi jahon urushi qatnashchisi D.Borunkin xonadonlariga tashrif buyurib, ularning turmush tarzi va oilaviy ahvolidan xabar olindi.

Shuningdek, tashrif chog`ida Samarqand shahar 61-sonli eshitishda nuqsoni bo`lgan bolalar uchun ixtisoslashtirilgan maktab-internati o`quvchilari bilan uchrashib, ularning sharoitlari bilan yaqindan tanishdi.

Bosh prokurorning tashrifi doirasida Pastdarg`om tumanidagi “Mirzatup” mahalla fuqarolar yig`ini hududidagi 1,05 km. masofadagi tuproq yo`lga shag`al yotqizildi, ko`cha bo`ylab 12 ta elektr simyog`ochlari o`rnatilib, kabellashtirilishi ta`minlandi.

Eng muhimi, fuqarolar tomonidan qabulda topshirilgan murojaatlar nazoratga olinib, qonuniy hal etilishi ta`minlanadi.