Kecha, 25 dekabr kuni “Mega Nukus” ko`ngilochar-savdo majmuasi oldida Shimoli-g`arbiy harbiy okrug harbiy xizmatchilari tomonidan “Vatanparvarlik – milliy yuksalish kafolati!” shiori ostida vatanparvarlik festivali o`tkazildi.
Nukus garnizoni Ma`naviyat va ma`rifat markazi harbiy orkestri hamda tashabbuskor ijodkor harbiylar tomonidan ijro etilgan kuy va qo`shiqlar yig`ilganlarda vatanparvarlik tuyg`ulari yanada jo`sh urishini ta`minladi. Orkestr sadolarining jonli ohangidan tomoshabinlar hayajonga kelib, unutilmas onlarni telefoniga muhrlay boshladi.
“Xo`jaylidan keldim”, – deydi Xorazm lazgisini maroq bilan tinglayotgan Munavvar Ishjanova. – “Harbiylar tomonidan o`tkazilayotgan konsertda ilk marotaba qatnashyapman. To`g`risini aytsam, hayajondaman. Vatanimizni himoya qilayotgan harbiylar bir qo`lida qurol, bir qo`lida soz bilan xalqimizning tinchligini ta`minlab, ko`nglini olishi tahsinga sazovor. Chekka tuman va qishloqlarda ham harbiylar bilan uchrashuvlar ko`proq tashkil etilishini istardim”.
O`zbekiston Respublikasining 2019 yil 5 sentyabrdagi «Xavfsizlik va mudofaa sohasidagi qonun hujjatlari takomillashtirilishi munosabati bilan O`zbekiston Respublikasining ayrim qonun hujjatlariga o`zgartish va qo`shimchalar kiritish to`g`risida»gi Qonunining 3-moddasiga muvofiq, “Harbiy qasamyod” matni o`rniga «Vatanga qasamyod» matni o`zgartirilgan edi. Festival doirasida harbiy xizmatchilar yig`ilganlarga “Vatanga qasamyod” matnini etkazishdi.
Faxriy qorovul vzvodi va muddatli harbiy xizmatchilar tomonidan tayyorlangan qo`l jangi elementlaridan iborat ko`rgazmali chiqishlar davraga o`zgacha shukuh bag`ishladi.
Shimoli-g`arbiy harbiy okrug matbuot xizmati
