O`zbekistonda Xitoyda tarqalgan koronavirusdan saqlanish uchun qanday choralar ko`rilmoqda?

Xitoyda koronavirus infeksiyasi tarqalishi va ayni paytda holat jiddiylashayotgani munosabati bilan Jahon sog`liqni saqlash tashkiloti favqulodda yig`ilish o`tkazdi. Unda xalqaro favqulodda holat e`lon qilish lozimligi, lekin avvalo mutaxassislar kasallik haqida ko`proq ma`lumotga ega bo`lishlari kerakligi aytildi.  Bu haqda Axborot va ommaviy kommunikasiyalar agentligida SSV hamda Sanitariya-epidemiologiya osoyishtalik agentligi tomonidan o`tkazilgan matbuot anjumanida so`z bordi.

JSST rahbari Tedros Gebreyesusning qayd etishicha, ehtiyotkorlik muhim ammo vahimaga o`rin yo`q. Xitoyning Uxan shahrida karantin bo`yicha qat`iy choralar ko`rilmoqda. Ular epidemiyaning avj olish va tarqalish ehtimolini kamaytirishga yordam beradi. 

"Bilimli kishi qurollangan bo`ladi" deydilar. Demak koronavirus kasalligi nima, unga qarshi qanday kurashish mumkin, ilk alomatlari qanday, davosi va asoratlari qanday bo`lishi haqida har bir fuqaro bilib qo`yishi maqsadga muvofiq. Xavfli koronavirus infeksiyasi haqidagi to`liq ma`lumotlarni bu erdan o`qishingiz mumkin.

Mamlakatda amalga oshirilayotgan choralar:

• Xitoyda koronavirus bo`yicha epidemik vaziyat murakkablashgani sababli «Uzbekistan Airports» AJ hamda “O`zbekiston temir yo`llari”AJ mutaxassislari tomonidan Xitoyga borib kelgan shaxslarning tibbiy monitoringi olib borilmoqda.
• Xitoydan keladigan yo`llardagi 37 ta bojxona postida karantin ishlari doirasida yo`lovchilar doimiy kuzatuvdan o`tkazilmoqda.
• “O`zbekiston temir yo`llari” hamda “O`zbekiston havo yo`llari” AJ tizimi xodimlari ishtirokida epidemik vaziyatning oldini olish yuzasidan seminar o`tkazildi.
• Respublika Virusologiya ilmiy tekshirish institutida koronavirusga gumon qilingan bemorlarni qabul qilish uchun maxsus bo`lim tayyorlab qo`yildi. Aeroport va temir yo`l vokzallaridagi sanitariya karantin punktlarida ushbu kasallikka gumon qilinganlarda chuqur tahlillar o`tkazish tartibi belgilandi.
• Respublika Sanitariya-epidemiologik osoyishtalik agentligi tomonidan koronavirus infeksiyasi kirib kelishi va tarqalishining oldini olish bo`yicha tadbirlar rejasi ishlab chiqildi.
• Koronavirusning yangi turi (nCoV)ga qarshi profilaktik chora-tadbirlar bo`yicha qo`llanma tayyorlandi

Manzura BEKJONOVA