Joriy yil 20 yanvar kuni Toshkent shahri aeroportlarida XTB JQB xodimlari tomonidan o`tkazilgan tezkor tadbir davomida fuqaro O.Sh. Islom Karimov nomidagi Toshkent xalqaro aeroportiga uchib kelgan fuqarolarni kutib olish maydonchasida «Dubay – Toshkent» reysi bilan uchib kelgan yo`lovchilardan noqonuniy ravishda har xil turdagi moddiy tovarlarni olayotgan vaqtida ushlanadi. Bu haqda IIV O`XB Turizm va Transport ob`ektlarida xavfsizlikni ta`minlash bo`yicha bo`limi xabar berdi.
Xolislar ishtirokida tekshirilgan vaqtida unda o`zining nomiga rasmiylashtirilmagan chet elda ishlab chiqarilgan 4 dona uyali aloqa vositasi, 3 dona planshet, 1 dona noutbuk, 2 dona qo`l soati borligi aniqlanib, hujjatlashtirilgan holda olib qo`yiladi.
Fuqaro O.Sh. esa holat yuzasidan surishtiruv harakatlarini olib borayotgan Toshkent shahri aeroportlarida xavfsizlikni ta`minlash boshqarmasi Jinoyat-qidiruv bo`limi katta tezkor vakili, mayor X.Nosirovga o`ziga nisbatan qonuniy chora ko`rmaslik va olingan buyumlarni qaytarib berishi evaziga 500 AQSh dollari miqdorida pora taklif qiladi. Xizmat burchi va qasamyodiga sodiq qolgan mayor holat yuzasidan IIV Transportda XTBB boshlig`i nomiga bildirgi bilan murojaat qiladi.
22 yanvar kuni soat 11:00da IIV O`XB Turizm va Transport ob`ektlarida xavfsizlikni ta`minlash bo`yicha bo`limi hamda Transport prokuraturasi hamkorligida o`tkazilgan tezkor tadbirda fuqaro O.Sh. xizmat xonasida mayor X.Nosirovga ishni «bosdi-bosdi» qilish, shuningdek, har oyda unga tegishli bo`lgan noqonuniy yuklarni aniqlamaslik evaziga 200 AQSh dollari miqdoridagi pora berib turishini aytib, shu miqdordagi pulni bergan vaqtida ushlandi.
Hozirgi paytda O`zbekiston Respublikasi Transport prokuraturasi tomonidan tergovoldi tekshiruv harakatlari olib borilmoqda.
